စက်တင်ဘာ ၁၄ ရက်၊ ၂၀၂၄ ခုနှစ်။ ကေအိုင်စီ
ကရင်ပြည်နယ်၊ ဖားအံမြို့တွင် သံလွင်မြစ်ရေစိုးရိမ်ရေအမှတ်အထက် ၂၁၈ စင်တီမီတာအထိ စံချိန်တင်မြင့် တက်လာနေ၍ မြို့ကုန်းမြင့်ပိုင်း ၃ နေရာသာရေလွတ်ဧရိယာရှိတော့ကြောင်း မြို့ခံကယ်ဆယ်ရေး လုပ်ဆောင် နေသူများက ပြောသည်။
ဖားအံမြို့၏ သံလွင်မြစ် စိုးရိမ်ရေအမှတ်မှာ ၇၅၀ စင်တီမီတာဖြစ်ပြီး ယခု ၉၆၈ စင်တင်မီတာ အထိထပ်တိုး တက်လာ၍ ဆယ်စုနှစ်အတွင်း ရေကြီးရေလွှမ်းမှုအမြင့်ဆုံး စံချိန်ကို ရောက်ရှိနေကြောင်း သိရသည်။
မြို့ခံကူညီကယ်ဆယ်ရေး လုပ်ဆောင်နေသူတစ်ဦးက “ကုန်မြှုပ်နေပြီ။ အိမ်တွေအလုံးလိုက်မြှုပ်နေပြီ၊ ရေလွတ်သေးတာဆိုလို့ အစိုးရရုံးကုန်း၊ ပြည်ထောင်စုကုန်း၊ ဆေးရုံကုန်းပဲကျန်တော့တယ်။ အဲ့ဒီပတ်ခြာ လည်လမ်းတွေ၊ ရပ်ကွက်တွေဘာမှ သွားမရတော့ဘူး။ ကားတွေတော်တော်များများမြှုပ်နေပြီ။ ရေဘေးစခန်းတွေပါ ပြန်နေရာရွှေ့ရမယ့် သဘောဖြစ်နေတော့ ကူညီမယ့်သူတွေတော်တော်လိုနေတယ် ” ဟု ပြောသည်။
ထိုသို့ ရေကြီး ရေလွှမ်းမှုကြောင့် ဖားအံ မြို့နှင့် အခြားမြို့များဖြစ်သော မော်လမြိုင်၊ လှိုင်းဘွဲ၊ မြိုင်ကလေး၊ အိန္ဒု ကျေးနယ်မြို့ရွာများဘက်သို့ ဆက်သွယ်သွားလာသည့် လမ်းပိုင်းများနှင့် လမ်းတစ်လျှောက်ကျေးရွာပေါင်းတစ်ရာနီးပါးရေးကြီးရေလွှမ်းနစ်မြှုပ်နေပြီး ရေဘေးကူညီ ကယ်ဆယ်ရေးအရေးပေါ် လိုအပ်နေကြောင်း သိရသည်။
“ အခုက ခါတိုင်းရေတက်နေကြထက် ပိုတက်လာတယ်။ ဒီနှစ်က အခု ၃ ခါမြောက် ပြန်ကြီးနေတာလေ ရေက။ ရွှေဂွန်း၊ မြိုင်ကြီးငူဘက်တွေ အကုန်မြှုပ်၊ လှိုင်းဘွဲ အကုန်မြှုပ်၊ မော်လမြိုင်ဖားအံ (အဖြောင့်လမ်း) အကုန်မြှုပ်ပဲ။ ဘယ်မှသွားလို့လာလို့မရတော့ဘူး၊ လှေပဲရတော့မယ်။ ဖုန်းတိုင်တွေ ပြတ်ပြီဆိုရင်တော့ အကုန် အဆက် အသွယ်ပြတ်ကုန်ရင် ကယ်မရကူမရ ဖြစ်ကုန်တော့မယ် ” ဟု မြိုင်ကလေး လူမှုကယ်ဆယ်ရေးအသင်းတွင် ကူညီလုပ်ဆောင်နေသူတစ်ဦးက ပြောသည်။
လက်ရှိ ဖားအံမြို့အမြင့်ပိုင်းနေရာရှိ ဘုရားကုန်း၊ ရုံးကုန်း နှင့်အရေးပေါ်ကယ်ဆယ်ရေးစခန်း ၊ ကျောင်းခန်းမ၊ အား ကစားရုံနေရာ ပေါင်း ၂၀ ခန့်တွင် ဒေသခံများကို နေရာရွှေ့ပြောင်းရေဘေးကယ်ဆယ်ရေးအစီအစဉ်များကို စစ်ကောင်စီမီးသတ်ဌာန၊ အရပ်ဖက်လူမှုကူညီရေးအသင်း၊ မြို့ခံရပ်ကွက်သား များပူးပေါင်းလုပ်ဆောင်နေကြကြောင်း သိရသည်။
