မတ်လ ၁၅ ရက်၊ ၂၀၂၄ ခုနှစ်။ ကေအိုင်စီ
မြဝတီမြို့မြောက်ဘက် သင်္ဃန်းညီနောင်ကျေးရွာရှိ စစ်ကောင်စီတပ်၏ ခြေမြန်တပ်ရင်း-ခမရ ၃၅၆၊ ခမရ ၃၅၇ ကို မတ်လ ၁၅ ရက်၊ နံနက်အစောပိုင်းက ကရင်အမျိုးသားလွတ်မြောက်ရေးတပ်မတော်-KNLA မဟာမိတ်ပူးပေါင်း တပ်များ ဝင်ရောက်တိုက်ခိုက်မှုပြုလုပ်သည့်အတွက် တိုက်ပွဲပြင်းထန်နေကြောင်း ဒေသတွင်း သတင်းအရင်းအမြစ်များက ပြောသည်။
စစ်ကောင်စီတပ်၏ တပ်ရင်းနေရာနှင့် တပ်ရင်းရှေ့ကာကင်း တပ်စွဲထားသည့် ဝှေ့ရှမ်းစာသင်ကျာင်းနေရာအား KNLA ပူးပေါင်းတပ်ဖွဲ့ဘက်က တိုက်ခိုက်ရှင်းလင်းနေပြီဖြစ်ကြောင်း မြေပြင်သတင်းအရင်းအမြစ်များက ပြောဆိုသည်။
၎င်းသတင်းအရင်းအမြစ်က “၃၅၇ စစ်တပ် နဲ့ ၃၅၆ စစ်တပ်ဝှေ့ရှမ်းစာသင်ကျာင်းဘက် တိုက်ပွဲ ဖြစ်နေတာ မနက် ၄ နာရီ ကျော်လောက်က စပစ်တာလက်နက်ကြီးတွေ ညီနောင်စစ်ဗျူဟာက ပစ်ထုတ်တာ ရွာထဲက လူတွေ ထိကုန်တယ်။ ရွာထဲက တခြားအိမ်တွေလည်း ထိကုန်တယ်။ အခု ၃၅၇ ဘက်ကို လေယာဉ်လာနေတယ်။ တိုက်ပွဲ ကတော့ ၃၅၆/၃၅၇ တပ်ဝင်းတွေကို နယ်မြေရှင်းနေပြီတော့ ကြားတယ်။ ”ဟု ပြောသည်။
ထို့အပြင် သင်္ဃန်းညီနောင် ခြေချစစ်ဗျူဟာ စစ်စခန်းဘက်တွင်လည်း တိုက်ပွဲအပြင်းအထန် ဆက်လက်ဖြစ်ပွား နေသည့်အတွက် စစ်တပ်လေကြောင်းက လာရောက် ဗုံးကြဲ ပစ်ခတ်ပစ်ကူပေးတိုက်ခိုက်နေကြောင်း အဆိုပါ စစ်ရေးနယ်မြေ သတင်းအရင်းအမြစ်က ဆက်လက်ပြောဆိုသည်။
“အခု ညီနောင်ဗျူဟာကို ဆက်ပြီးလုံးနေတယ်။ လေယာဉ်က ဗုံးကြဲတယ်။ ပစ်ချတယ်။ သူတို့ ကုန်းကိုကပ်လာပြီး တိုက်မရအောင်ပေါ့။ စစ်တပ်လက်နက်ကြီးကတော့ ဆက်တိုက်ပစ်ချနေတာ ဝှေ့ရှမ်း၊ မဲပလဲ၊ ဇရပ်ဖြူကုန်း၊ ခြေတော်ရာတောင်ဘက်ကို ကျတယ်”ဟု ပြောသည်။
နှစ်ဘက်တိုက်ပွဲကြောင့် ဝှေ့ရှမ်းကျေးရွာ ရပ်ကွက် ၂ နှင့် ရပ်ကွက် ၇ ထဲသို့ လက်နက်ကြီး ကျရောက်ပေါက်ကွဲ၍ အသက် ၇၀ ကျော်အရွယ် အဖွားတစ်ဦးနှင့် အသက် ၄၀ ကျော်ရွာသားတစ်ဦးပွဲချင်းပြီးသေဆုံးခဲ့သလို ၄ ဦး ထိခိုက်ဒဏ်ရရှိသည်ဟု ဒေသခံများ၏ ကောက်ခံထားသည့် စာရင်းအရ သိရသည်။
ထို့အပြင် တိုက်ပွဲဖြစ်စဉ်အတွင်း လက်နက်ကြီးအဆက်မပြတ် ပစ်ခတ်မှုအပြင် လေကြောင်းတိုက်ခိုက်မှုများပါ ပြင်းပြင်းထန်ထန်လုပ်ဆောင်သည့်အတွက် ဝှေ့ရှမ်းရွာသားများမှာ နေအိမ်တွင်းမထိုင်ရဲကြတော့ဘဲ ဘေးလွတ်ရာသို့ ရွာလုံးကျွတ် စစ်ဘေးတိမ်းရှောင်ကြရကြောင်းလည်း ဒေသခံများက ပြောသည်။
လက်ရှိ မြဝတီမြို့အထွက် သင်္ဃန်းညီနောင် အာရှလမ်းပိုင်း၊ ကုန်သွယ်ရေးဇုန် နေရာများကို ကရင်နယ်ခြား စောင့် တပ် BGF က လမ်းပိတ်ထားပြီး မြို့တွင်းတွင်လည်း ကင်းလှည့်စောင့်ကြပ်မှုရှိနေကြောင်း မြဝတီ မြို့ခံများ ပြောစကားအရ သိရသည်။
