ကြယ်တစ်စင်းလို….လတစ်စင်းလို …..
ဓူဝံကြယ်အလင်းတန်းနဲ့
မှောင်မိုက်ညတွေမှာ
လာရာလမ်းတွေကနေ
လားရာပန်းတိုင်ဆီသို့ လမ်းပြသူ။
လတစ်စင်းလို ကြယ်တစ်စင်းလို
အမှောင်ခွင်း အလင်းပေး
ရေဆန်ကလောင်ကိုကိုင်
ကရင့်သမိုင်းကို သူသွေးနဲ့ရေး
ဘဝရေဆန်ကိုကျတော့
ထမင်းအငတ်ခံဆန်တက်
တော်လှန်ရေးရေဆန် ချီတက်ခဲ့သူ။
မူလေးချက်ကို
အသက်နဲ့လဲပြီး ကာကွယ်ခဲ့သူ။
နိုင်ငံရေးလောကဓံအမျိုးမျိုးနဲ့
စီးချင်းထိုးရင်ဆိုင်
ကရင့်အမျိုးသားအလံတော်ကို
ဘယ်တော့မှ အလဲမခံခဲ့တဲ့သူ။
”အဖိနှိပ်ခံပြည်သူတိုင်းနဲ့အတူ
ကျွန်တော်ရပ်တည်တယ်” ‘
‘ခေါင်းဆောင်ဆိုတာ
အသိအမှတ်ပြုလောက်တဲ့
သမိုင်းဖြတ်သန်းမှုရှိရမယ်”
သမိုင်းမှာ အရှားပါးဆုံး
နေမဝင်စကားလုံးတွေ။
အာဏာရှင်အဆက်ဆက်အောက်မှာ
အနာဂတ်ပျောက်နေကြမဲ့အစား
လမ်းပြခေါင်းဆောင်ရဲ့စကားနဲ့
မိတ်ဆွေရန်သူခွဲခြား
အနာဂတ်ပန်းတိုင်ကို ဆက်သွားကြမလား
ငါတို့ ……… ပြတ်သားကြရတော့မယ်။
နန့်အေးအေးအောင် (ပန်းတနော်) (၁၄. ၂. ၂၀၀၈)နေ့တွင် ကရင့်အမျိုးသားတော်လှန်ရေးအတွက် အသက်ပေးသွားခဲ့သော ကရင်အမျိုးသား အာဇာနည်ကြီး ဖဒိုမန်းရှာလားဖန်းအား ဤကဗျာဖြင့် ဂုဏ်ပြုအပ်ပါသည်။
