စက်တင်ဘာလ ၁၅ ရက်၊ ၂၀၂၃ ခုနှစ်။ ကေအိုင်စီ
ကေအဲန်ယူ-ကရင်အမျိုးသားအစည်းအရုံး၊ ခလယ်လွီထူ (ညောင်လေးပင်)ခရိုင်၊ တပ်မဟာ(၃)နယ်မြေ၊ မုန်းမြို့နယ် ကျေးရွာများသို့ စက်တင်ဘာလ ၁၄ ရက်နေ့တွင် စစ်ကောင်စီက တိုက်ခိုက်ရေးရဟတ် ယာဉ် ၃ စီးဖြင့် ၁၃ ကြိမ်ခန့် လာရောက်ပစ်ခတ်ခဲ့ခြင်းကြောင့် ကျေးရွာ ၆ ရွာမှ ဒေသခံပြည်သူစုစုပေါင်း (၅,၂၉၅) ဦး ဘေးလွတ်ရာသို့ ထွက်ပြေးတိမ်းရှောင်နေရကြောင်း ကေအဲန်ယူ ဗဟိုက ယနေ့တွင် သတင်း ထုတ်ပြန်ထားသည်။
စစ်ကောင်စီတပ်၏ တိုက်ခိုက်ရေးသုံး ရဟတ်ယာဉ်ဖြင့်် ဗုံးကြဲတိုက်ခိုက်ခြင်းကြောင့် ဟော်ခိုဂေါကျေးရွာ၊ မယ်တလင်ကျေးရွာ၊ ဆင်းပုလဲကျေးရွာ၊ လူအရွာ၊ မယ်တလင်ရွာနှင့် ထွာနီကုန်းရွာအတွင်းရှိ နေအိမ် အ ဆောက်အဦး ပျက်စီးဆုံးရှုံးမှုများရှိနေသည့်အပြင် ၎င်းကျေးရွာများထဲသို့ စစ်ကောင်စီတပ်များက ဝင်ရောက် တပ်စွဲလာသည့်အတွက် အိမ်ခြေစုစုပေါင်း (၉၄၇)လုံးမှ လူဦးရေစုစုပေါင်း (၅,၂၉၅)ဦးမှာ နေရပ်စွန့်ခွာခဲ့ရခြင်းဖြစ်သည်။
အလားတူ မုန်းနှင့် ကျောက်ကြီး မြို့နယ်များထဲရှိ ကျေးရွာများထဲတွင် စစ်ကောင်စီတပ်၏ လက်နက်ကြီး ပစ်ခတ်မှု၊ ကျေးရွာအတွင်းသို့ စစ်ကြောင်းထိုးခြင်းနှင့် လူ့အခွင့်အရေးချိုးဖောက်မှုများကိုလည်း မကြာ ခဏပြုလုပ်နေလျက်ရှိကြောင်းလည်း ကေအဲန်ယူဗဟို၏ ထုတ်ပြန်ချက်အရ သိရသည်။
လက်ရှိ စစ်ဘေးရှောင်နေရသည့် ဒေသခံများအနေဖြင့် မိုးကြီးရေလျှံမှုများကြောင့် စစ်ဘေးအပြင် ရေး ဘေးနှစ်ခုစလုံးကိုပါ ရင်ဆိုင်ကြုံတွေ့နေရသောကြောင့် ဒေသခံပြည်သူများအနေဖြင့် စာနပ်ရိက္ခာများ၊ ဆေးဝါးများနှင့်နေရာထိုင်ခင်း အမိုးအကာများ စသည့်အရေးပေါ်လူသားချင်စာနာထောက်ထားမှုဆိုင်ရာ အကူအညီများ လိုအပ်နေပြီး မုန်းမြို့နယ် ကရင်အရေးပေါ်ကူညီကယ်ဆယ်ရေးကော်မတီနှင့် ကေအဲန်ယူ−သတင်းနှင့်ပြန်ကြားရေးဗဟိုသို့ တိုက်ရိုက်ဆက်သွယ် လှူဒါန်းနိုင်ကြောင်းလည်း ထုတ်ပြန်ချက်တွင် ဆိုထားသည်။
ထိုသို့ စစ်ကောင်စီတပ်၏ လက်နက်ကြီးပစ်ခတ်မှု၊ လေကြောင်းတိုက်ခိုက်မှုနှင့် လူ့အခွင့်အရေးချိုး ဖောက်နေမှုများသည် ကေအဲန်ယူ တပ်မဟာ ၃ နယ်မြေအတွင်းသာမက အခြားသော တပ်မဟာ (၆) ၊ တပ်မဟာ(၁)၊ တပ်မဟာ(၅)၊ တပ်မဟာ(၄)နှင့် တပ်မဟာ(၂) နယ်မြေများတွင်လည်း အလားတူ လုပ်ဆောင်မှုများရှိနေပြီး သိန်းနှင့်ချီသည့် ဒေသခံများလည်း စစ်ဘေးရှောင်နေကြရဆဲဖြစ်သည်ဟု သိရသည်။
