Home သတင်း တောင်ငူခရိုင်ရှိ ကျေးရွာနှစ်ရွာမှ ဒေသခံနေအိမ်များအား စစ်ကောင်စီတပ်အကြောင်း မဲ့မီးရှို့

တောင်ငူခရိုင်ရှိ ကျေးရွာနှစ်ရွာမှ ဒေသခံနေအိမ်များအား စစ်ကောင်စီတပ်အကြောင်း မဲ့မီးရှို့

532

စက်တင်ဘာ ၁၅ ရက်၊ ၂၀၂၃ ခုနှစ်။ ကေအိုင်စီ

ပဲခူးတိုင်းဒေသကြီး၊ တောင်ငူခရိုင်၊ တောင်ငူမြို့နယ် ကယားပြုံးချောင်းနှင့်ရှမ်းပြုံး ချောင်းကျေးရွာများသို့ ဝင်ရောက်လာသော စစ်ကောင်စီတပ်များက ရွာအတွင်းရှိ နေအိမ်နှင့်ပစ္စည်းများအား ယမန်နေ့ စက်တင်ဘာလ(၁၄)ရက်နေ့တွင် မီးရှို့ ဖျက်ဆီးခဲ့ကြောင်း ဒေသခံများ၏ ပြောပြချက်အရ သိရသည်။

အဆိုပါကျေးရွာနှင့်အနီးတဝိုက်သို့စက်တင်ဘာလ(၁၃)ရက်နေ့က ဝင်ရောက် လာသော စစ်ကောင်စီတပ်များသည် တိုက်ပွဲဖြစ်ပွားခြင်းမရှိဘဲ ကျေးရွာ(၂)ရွာမှာ ကနဦးသိရှိရသည့် ရွာနေလူထုပိုင် ဆန်စက်နှင့် နေအိမ်(၃)လုံးထက်မနည်းအား မီးရှို့ ဖျက်ဆီးမှု လုပ်ဆောင်ခဲ့ခြင်းဖြစ်သည်ဟု ဒေသခံများက ဆိုသည်။

“တိုက်ပွဲဘာညာလည်း မရှိဘူး။ ရှို့သွားတာ ကယားပြုံးချောင်းရော၊ ရှမ်းပြုံးချောင်းရော နှစ်ရွာလုံးပဲ။ ရွာထဲတပ်ချထားတာတော့ မဟုတ်ပါဘူး။ ဒီတိုင်းရွာထဲလျှောက်သွား၊ သွားပြီးတော့ သူတို့မသင်္ကာတာရှိလို့ မီးရှို့ပစ်လိုက်တယ်ပဲ ကြားတယ်။ သပ်သပ်ရှို့ ပစ်တာပါ မယုံသင်္ကာဖြစ်လို့ရော အမြင်ကပ်ပုဒ်မနဲ့ရှို့တာလည်း ပါမှာပေါ့” ဟု အမည် မဖော်လိုသူ ဒေသခံအမျိုးသားတစ်ဦးက ပြောသည်။

ရွာအတွင်း ဝင်ရောက်လာသော စစ်ကောင်စီတပ်များကြောင့် ကျေးရွာနေဒေသခံ သက်ကြီးရွယ်အိုများအပါအဝင် ကလေးသူငယ်များ၊ အမျိုးသမီးများက နေအိမ်စွန့်ခွာ တိမ်းရှောင်ခဲ့ကြသော်လည်း ရွာအတွင်းကျန်နေသူများရှိနေသေးသဖြင့် နေအိမ်မီးရှို့ မှုအတွင်း လူထုထိခိုက်မှုရှိမရှိနှင့် ထိခိုက်ပျက်စီးသွားသော နေအိမ်အရေအတွက် အတိ အကျကိုမူ ကေအိုင်စီ-ကရင်သတင်းဌာနအနေဖြင့် ဆက်လက်စုံစမ်းနေဆဲဖြစ်သည်။

သံတောင်-တောင်ငူ-လိပ်သို လမ်းများတွင်လည်း စစ်ကောင်စီတပ်ဂိတ်စခန်းများမှ ဖြတ်သန်းသွားလာသူတိုင်းအား စစ်ဆေးမှုများပြုလုပ်၍ နိုင်ငံရေးနှင့် ပတ်သက် သည်များတွေ့ရှိပါက ဖမ်းဆီးအရေးယူခြင်းများ ဆက်လက်ရှိနေသဖြင့် ဒေသခံများ သွားလာရေးနှောင့်နှေးကြန့်ကြာမှုများတွေ့ကြုံနေရကြောင်း မြို့ခံလူထုက ပြောဆိုကြသည်။

ထို့အတူ ယခုနှစ်အစောပိုင်းက မြို့တွင်းပစ်ခတ်မှုများကြောင့် ဒေသခံအများစု စွန့်ခွာ ထွက်ပြေးခဲ့ကြသော သံတောင်ကြီးမြို့နယ်၊ သံတောင်(၁၃)မိုင်တွင်လည်း မြို့ခံများ၏ နေအိမ်များအား စစ်ကောင်စီက တော်လှန်ရေးအင်အားစုများ ခိုလှုံနေသည် အထင်ဖြင့် လည်းကောင်း၊ မသင်္ကာမှုဖြင့်လည်းကောင်း မီးရှို့ဖျက်ဆီးမှုများ မကြာ ခဏလုပ် ဆောင်ခဲ့ကြရာ ယခုဩဂုတ်လအထိ မီးရှို့ဖျက်ဆီးခံခဲ့ရသော နေအိမ်အလုံး (၃၀) ထက်မနည်းရှိလာပြီဖြစ်သည်။

စစ်ကောင်စီ အာဏာသိမ်းယူသည့် ၂၀၂၁ ခုနှစ်၊ ဖေဖော်ဝါရီလမှ ယခုနှစ်ဝက်တာ ကာလအထိ မြန်မာနိုင်ငံတဝှမ်း မြို့နယ်ပေါင်း ၁၀၆ မြို့နယ်တွင် စစ်ကောင်စီ၏ မီးရှို့ ဖျက်ဆီးခြင်းခံခဲ့ရသော ပြည်သူလူထုပိုင် နေအိမ်နှင့်အဆောက်အဦး စုစုပေါင်း ရှစ် သောင်းကျော်ရှိလာပြီဖြစ်ကြောင်း မြန်မာ့မဟာဗျူဟာနှင့် မူဝါဒရေးရာလေ့လာရေး အင်စတီကျု (ISP- Myanmar) ၏ စာရင်းပြုစုထုတ်ပြန်ချက်အရ သိရသည်။