Home သတင်း ကော့ကရိတ်တွင် စစ်ကောင်စီတပ်ဖွဲ့ဝင်များ သေနတ်ပစ်ဖောက်ပြီး တစ်အိမ်ဝင်တစ်အိမ်ထွက် ဧည့်စာရင်းလိုက်လံ စစ်ဆေးမှုများပြုလုပ်နေ

ကော့ကရိတ်တွင် စစ်ကောင်စီတပ်ဖွဲ့ဝင်များ သေနတ်ပစ်ဖောက်ပြီး တစ်အိမ်ဝင်တစ်အိမ်ထွက် ဧည့်စာရင်းလိုက်လံ စစ်ဆေးမှုများပြုလုပ်နေ

209

ဩဂုတ်လ ၁၇ ရက် ၊ ၂၀၂၂ ခုနှစ်။ ကေအိုင်စီ

ကရင်ပြည်နယ်၊ ကော့ကရိတ်မြို့ပေါ်တွင် စစ်ကောင်စီတပ်ဖွဲ့ ဝင်များက မြို့တွင်းပစ်ခတ်မှုများပြုလုပ်ခဲ့ပြီးနောက် တစ်အိမ်ဝင်တစ်အိမ်ထွက်ဧည့် စာရင်းများလိုက်လံစစ်ဆေးမှုများပြုလုပ်လျက်ရှိကြောင်းဒေသခံများပြောစကားအရ သိရသည်။

ဩဂုတ်လ ၁၇ ရက်နေ့ ညနေမွန်းလွဲ ပိုင်းအချိန်တွင် ကားနှစ်စီးဖြင့် အင်အား၂၀ ကျော်ပါ စစ်ကောင်စီတပ်ဖွဲ့ ဝင်များသည် ကော့ကရိတ်မြို့အတွင်းသို့ဝင် ရောက် လာပြီး သေနတ်များကိုမိုးအပေါ်သို့ထောင်ကာ ရမ်းသမ်းပစ်ခတ်မှုများ ပြုလုပ်ခဲ့ သည်ဟု မြို့ခံတစ်ဦးက ယခုလို ပြောသည်။

“ညနေ၄ ခွဲ ကျော်တော့ဝင်လာကျတာ အင်အားက၂၀ ကျော်ပါတယ်သေနတ် တွေ ထုတ်ပြီး ပစ်တော့တာပဲ ၊ အကုန်အပြေးအလွှား တစ်မြို့လုံး၊ အိမ်တွေထဲ တန်းဝင် တံခါးတွေပါပိတ် တစ်မြို့လုံးငြိမ်ကျသွားတယ်၊ အော်ဆဲပြီးလိုက်ပစ်တာ ၊ ဆိုင်ကယ်နဲ့ လူနှစ်ယောက်ကို လိုက်ပစ်တာ မမှန်လို့တော်သေးတယ်။ မိုးပေါ်ထောင် ပစ်ရင်းကနေ တွေ့သွားလို့လိုက်ပစ်တာ “ဟု သူက ကေအိုင်စီသို့ပြောသည်။

မြို့တွင်းပစ်ခတ်မှုများ ဖြစ်ပွားပြီးနောက် ည ၈ နာရီ ဝန်းကျင်ခန့်တွင် ရာအိမ်မှူး၊ ဆယ်အိမ်မှူး အိမ်ချုပ်ရေးမှူး၊ ရပ်ကွက်သတင်းပေးများဟု ယူဆသူများ၊ ရဲ၊ စစ်သား များသည် လက်နက်အပြည့်အစုံဖြင့် ပြည်သူများ၏ နေအိမ်များအတွင်းဝင်ကာ လိုက်လံစစ်ဆေးမှုများ လုပ်ဆောင်နေသည်ဟု မြို့ခံများက ပြောသည်။

ပြီးခဲ့တဲ့ဩဂုတ်လ ၁၅ ရက်နေ့နံနက် ၁၁နာရီဝန်းကျင်ခန့်တွင် ကော့ကရိတ်မြို့တွင်း သို့ စစ်အာဏာရှင် တော်လှန်ရေးပူးပေါင်းတပ်များမှ ရဲစခန်း ၂ ခုနှင့် စစ်ကောင်စီဘဏ်လုံခြုံရေးကတုတ် ကင်းအား ပစ်ခတ်တိုက်ခိုက်ခဲ့သည်။

ထိုသို့ ပစ်ခတ်မှုအပြီး ပြန်လည်ဆုတ်ခွာ လာချိန်တွင် စစ်ကောင်စီတပ်၉၇ တပ်မှ ၁၃၀ မမ ဖြင့် အနီးနားရှိများကိုရမ်းသမ်းပစ်ခတ်ခဲ့ပြီး အံ့ကောင်ကျေးရွာရှိ လူနေအိမ် (၂)လုံး၊ ဆိုင်ကယ်(၂) စီးထိခိုက်ပျက်စီးပြီး အရပ်သား ၅ ဦးထက်မနည်း ထိခိုက်ဒဏ်ရာရရှိသည်ဟု ဒေသခံများက ပြောသည်။