“တစ်ဖက်ကကြည့်ရင် ခြံခွထိုင်တယ်လို့ ပြောရမလား၊ ဒါကတော့ အစကတည်းက ဂျပန်အစိုးရရဲ့ မူဝါဒလို့ ထင်ပါတယ်။ သာတဲ့ဘက်ကို ဦးစားပေးမယ်ဆိုတဲ့ သဘောတော့ ရှိတယ်လို့ ကျနော်မြင်ပါတယ်” စောဘလှသိန်း (ဂျပန်နိုင်ငံဆိုင်ရာ ကိုယ်စားလှယ်-NUG)
(NUG) အစိုးရ၏ ဂျပန်နိုင်ငံဆိုင်ရာကိုယ်စားလှယ်နှင့် မေးမြန်းချက်
(ဖေဖော်ဝါရီ ၈ ရက်၊ ၂၀၂၂ ခုနှစ်)
ဂျပန်နိုင်ငံနှင့် ဆက်ဆံရေးတိုးမြှင့်ရန်ရည်ရွယ်ကာ အမျိုးသားညီညွတ်ရေး အစိုးရက မြန်မာ့အရေးဆောင်ရွက်နေသူ စောဘလှသိန်းအား ဂျပန်နိုင်ငံဆိုင်ရာ ကိုယ်စားလှယ်အဖြစ် ခန့်အပ်လိုက်သည်ဟု NUG ၏ နိုင်ငံခြားရေးဝန်ကြီးဌာနက ဖေဖော်ဝါရီလ ၁ ရက်နေ့တွင် ထုတ်ပြန်ခဲ့သည်။
ဂျပန်နိုင်ငံနှင့် ဆက်ဆံရေး တိုးမြှင့်ဆောင်ရွက်နိုင်ရန်၊ ဂျပန်နိုင်ငံရောက်မြန်မာ နိုင်ငံသားများ ပူးပေါင်းဆောင်ရွက်နိုင်ကြစေရန်နှင့် ဂျပန်နိုင်ငံရောက် မြန်မာနိုင်ငံသားများ တွေ့ကြုံနေရသော အခက်အခဲများကို ကူညီဖြေရှင်းနိုင်ရန် ရည်ရွယ်ပြီး ဂျပန်နိုင်ငံဆိုင်ရာ ကိုယ်စားလှယ်ကို ခန့်အပ်ကြောင်း NUG နိုင်ငံခြားရေးဝန်ကြီးဌာနက ထုတ်ပြန်ထားသည်။ NUG ၏ ဂျပန်နိုင်ငံဆိုင်ရာ ကိုယ်စားလှယ်စောဘလှသိန်းကို ဆက်သွယ်မေးမြန်းထားပါသည်။
မေး- NUG အစိုးရကနေပြီးတော့ ဂျပန်နိုင်ငံဆိုင်ရာကိုယ်စားလှယ်အနေဖြင့် ခန့်အပ်ခံလိုက်ရတဲ့ အခြေအနေလေးကို ကနဦး ရှင်းပြပေးပါအုံး။
ဖြေ – ဒီလို ကိုယ်စားလှယ် ခန့်အပ်ခံရတော့ တစ်ဖက်က ဝမ်းသာပါတယ်။ တစ်ဖက်ကတော့ ဝန်ကြီးတွေလို တာဝန်မများပေမဲ့လည်း ကိုယ်စားလှယ်အနေနဲ့ လုပ်သင့်လုပ်ထိုက်တာလုပ်လို့ရတာတွေကို လုပ်ဖို့ အစီအစဉ်ရှိပါတယ်။ နောက်ပြီးတော့ ကျနော်ကလည်းဒီဟာကို မစဉ်းစားထားပါဘူး။ ဘာဖြစ်လဲဆိုတော့ ကျနော်တို့ ဂျပန်ကို ၁၉၉၂ မှာ ရောက်ပြီးတော့ ၁၉၉၆ မှာ ကရင်များအဖွဲ့ အနေနဲ့ လှုပ်ရှားမှုများ ရှိသလို ၂၀၀ဝ ခုနှစ်မှ စပြီးတော့ ကျနော်တို့ ကရင်အဖွဲ့အစည်းအပါအဝင် အခြားသော မြန်မာ ဒီမိုကရေစီအဖွဲ့အစည်းများနဲ့ ပူးပေါင်းလုပ်ဆောင်ကြတာ ရှိပါတယ်။ အမျိုးသားရေးနဲ့ ဒီမိုကရေစီအရေးကို ပူးပေါင်းပြီးလုပ်ဆောင်ခဲ့ခြင်းကြောင့် ဒီလိုပဲ ကျနော်တို့ ဖြစ်ချင်တာတွေကို ဖြစ်လာဖို့အတွက် လုပ်ဆောင်ခဲ့ကြပါတယ်။ ကျနော်တို့ ရိုးရိုးပဲ လုပ်ဆောင်ခဲ့ပါတယ်။ ဒါပေမဲ့ လွန်ခဲ့တဲ့လက ကျနော်တို့ ဝန်ကြီးများနဲ့ တိုင်ပင်ဆွေးနွေးပြီးတော့မှ ဒီမှာသူတို့ ကိုယ်စားလှယ်ထားဖို့ ကိစ္စ အကြောင်းနဲ့ ဂျပန်မှာရှိတဲ့ အင်အားစုများကလည်း လုပ်ဖို့အတွက် ထောက်ခံ ရွေးချယ်တာရော ဟိုဘက်က ဝန်ကြီးတွေရဲ့ ထောက်ခံရွေးချယ်တဲ့ အပိုင်းလည်းရှိနေတဲ့ အတွက်ကြောင့် လုပ်သင့်လုပ်ထိုက်တာ လုပ်နိုင်တာကို လုပ်မယ်လို့ ခံယူပါတယ်။
မေး- အဓိက လုပ်ဆောင်သွားချင်တဲ့ အရာတွေ၊ NUG က ပေးအပ်လာတဲ့ တာဝန်တွေက ဘာတွေရှိမလဲ။
ဖြေ – အခြား ၅ နိုင်ငံမှာလည်းပဲ ဒီလို လုပ်ပြီးသားဖြစ်တဲ့အတွက်ကြောင့် ဂျပန်နိုင်ငံမှာလည်းပဲ အဲ့ဒီ ၅ နိုင်ငံထက်စာရင် နောက်ဆုံးမှာဖြစ်ပေမဲ့ အစောဆုံးကတည်းက လုပ်ကြဖို့ အစီအစဉ်ရှိပါတယ်။ ဒီ NUG အနေနဲ့ ၁ဝလ ၁၁ လပိုင်းကတည်းက လုပ်ဖို့ အစီအစဉ်ရှိပေမဲ့ အကြောင်းအမျိုးမျိုးကြောင့် ဆုံးဖြတ်ချက် နောက်နှေးရပေမဲ့ ဆုံးဖြတ်ချက် အတည်ပြုမှု ဖြစ်လာတဲ့အတွက်ကြောင့် သာမန်ပြည်သူတစ်ယောက်အနေနဲ့ ရိုးရိုးလေးပဲ လုပ်နိုင်တယ်ဆိုပေမဲ့ ကိုယ်စားလှယ် အနေနဲ့သော်လည်းကောင်း ရုံးအနေနဲ့သော်လည်ားကောင်း လုပ်ဖို့ ကိစ္စကတော့ ရှိပါတယ်။ အဓိက ကတော့ နိုင်ငံရေး သံသမန်ရေးကို အဓိက လုပ်သွားဖို့ ရှိသလို အဓိက ၆ ချက်အနေနဲ့ NUG အစိုးရ နဲ့ ဂျပန်အစိုးရအကြား အဆက်အသွယ်ဆောင်ရွက်ဖို့အတွက်။ နောက်တစ်ခုကတော့ NUG ရဲ့တိုးတက်ရာ တိုးတက်ကြောင်းတွေ နဲ့ ဂျပန် အစိုးရအနေနဲ့ NUG ကို တရားဝင်အစိုးရ အနေဖြင့် အသိအမှတ်ပြုဖို့ နောက်တစ်ခုက NUG ကညွန်ကြားလာတဲ့ ကိစ္စတွေကို ဒီနှစ်နိုင်ငံ ကိစ္စ ဆောင်ရွက်ရမဲ့ ကိစ္စ။ နောက်တစ်ခုက NUG ဝန်ကြီးများ ဂျပန်နိုင်ငံသို့ လာရင် ဆက်သွယ်ဆောင်ရွက်ပေးဖို့ ကိစ္စ နောက်တစ်ခါ မီဒီယာ ကနေ သတင်းဝက်ဘ်ဆိုက်ကနေပဲဖြစ်ဖြစ်၊ ကျနော်တို့ ကိုယ်တိုင်ကပဲဖြစ်ဖြစ် သတင်းအမှန်တွေကို ဂျပန်ပြည်သူနဲ့ ဂျပန်အစိုးရကိုပေးဖို့ကိစ္စ။ နောက် နံပါတ် ၆ အနေနဲ့ NUG ရဲ့ နိုင်ငံခြားရေး မူဝါဒတွေကို အကောင်အထည်ဖော်ပေးဖို့ ဖြစ်ပါတယ်။
မေး- မြန်မာ့နိုင်ငံရေးနဲ့ပတ်သက်ပြီး စစ်ကောင်စီကကော NUG ကကော၊ သက်ဆိုင်ရာ ကိုယ်စားလှယ်တွေ ခန့်အပ်မှုတွေရှိနေတဲ့အပေါ်မှာ ဘက်နှစ်ဖက်ရဲ့ ကိုယ်စားပြုမှုအပိုင်းနဲ့ ပတ်သက်ပြီး ဂျပန်အစိုးရရဲ့ သဘောထားကို ဘယ်လို သိထားပါသလဲ။
ဖြေ-ရပ်တည်ချက်အနေနဲ့ကတော့လောလောဆယ်သိရတာတော့ G To G ပေါ့၊ အစိုးရချင်း အစိုးရ ဆက်သွယ် ဆောင်ရွက်တာတွေရှိတယ်။ လောလောဆယ်အခြေအနေမှာတော့ NUG က ကျနော်တို့ရဲ့ အစိုးရ ပြည်သူတွေ ရွေးကောင်တင်မြှောက်ထားတဲ့ အစိုးရ၊ အစိုးရအသစ်လည်း မဟုတ်ဘူး။ အကြောင်းအကြောင်းကြောင့် လောလောဆယ် တဖက်သတ် နှင်ထုတ်ခံထားရတဲ့ အစိုးရပေါ့နော်။ အဲ့ဒီမှာ မူတည်ပြီးတော့မှ စကစ ကလည်း တစ်ဖက်မှာရှိနေတဲ့အတွက်ကြောင့် ဂျပန်အနေနဲ့က စကစကို အစိုးရအနေနဲ့ အသိအမှတ်မပြုပါဘူး။ နောက်တစ်ခုက NUG ကိုလည်း လောလောဆယ် အသိအမှတ်မပြုသေးပါဘူး။ အဲ့ဒါကြောင့် ကျနော်တို့က NUG ကို Legally အသိအမှတ်ပြုအောင် လုပ်ဆောင်ရမှာဖြစ်သလို တစ်ဖက်ကလည်း စကစ နဲ့ပတ်သက်တဲ့ သံရုံးဝန်ထမ်း များနေရာ အစားထိုး ခြင်းတို့လည်း ပုံစံတစ်မျိုးနဲ့ ထိုးတာရှိခဲ့ပါတယ်။ တစ်ဖက်ကကြည့်ရင် ခြံခွထိုင်တယ်လို့ ပြောရမလား ဒါကတော့ အစကတည်းက ဂျပန်အစိုးရရဲ့ မူဝါဒလို့ ထင်ပါတယ်။ သာတဲ့ဘက်ကို ဦးစားပေးမယ်ဆိုတဲ့ သဘောတော့ရှိတယ်လို့ ကျနော် မြင်ပါတယ်။ အဲ့အတွက်ကြောင့် ဒါကိုလည်း ကျနော်တို့က တတ်နိုင်တဲ့ဘက်က ကြိုးစားရအုံးမှာဖြစ်ပါတယ်။
မေး- ဒီလို ဂျပန်အစိုးရရဲ့ ရှင်းလင်းပြတ်သားမှုမရှိတဲ့ ရပ်တည်ချက်နဲ့ပတ်သက်ပြီး ဘယ်လို မှတ်ချက်ပြုပြောချင်လဲ။
ဖြေ-ဂျပန်မှာ လွှတ်တော်အမတ်များ သမဂ္ဂဆိုပြီး မြန်မာ့ဒီမိုကရေစီရေး ကိုထောက်ခံဖို့ ဖွဲ့ထားတဲ့ သမဂ္ဂရှိပါတယ်။ အဲ့ဒီအဖွဲ့က ကျနော်တို့ကို အပြည့်အဝ ထောက်ခံပြီးတော့မှ တတ်နိုင်သလောက် ထောက်ပံ့မှု အပြည့်အဝ ပေးပြီးတော့ တဖက်ကနေ ကူညီဆောင်ရွက်ပေးနေတာတွေ ရှိပါတယ်။ ခုနက ခြံခွထိုင်တဲ့ ကိစ္စရပ်များ လည်းရှိသလို ဂျပန်ရောက် ပြည်သူများရဲ့ ကြိုးစားမှုကြောင့် ကျန်ခဲ့တဲ့ (အာဏာသိမ်းမှု) တစ်နှစ်ပြည့်ဖြစ်တဲ့ တစ်ရက်နေ့မှာ အဆင့်မြင့် အရာရှိတစ်ဦးအနေနဲ့ ဗမာ့နိုင်ငံရေးကို ကောင်းကောင်းမွန်မွန်ပြောသွားတယ်လို့ တော့ ထင်ပါတယ်။ နိုင်ငံခြားရေး ဝန်ကြီးကနေပြီးတော့ အချက် ၅ ချက်လောက်ကို သူပြောသွားပါတယ် သတင်းစာရှင်းလင်းပွဲမှာ။ မြန်မာပြည်သူများရဲ့ သေဆုံးရမှုကို သူ့အနေနဲ့ ဝမ်းနည်းကြေကွဲကြောင်း၊ ခံစားရ ကြောင်း ပြောသွားသလို စကစရဲ့ လုပ်ရပ်များကို ရပ်တန့်ပြီးတော့မှ ဖမ်းထားသူများကို အမြန်ဆုံး ပြန်လွှတ် ပေးဖို့ နောက်ပြီးတော့ မြန်မာငြိမ်းချမ်းရေး အထူးသံတမန် ကိုယ်စားလှယ် စေလွှတ်ပြီးတော့ နိုင်ငံတကာနဲ့ ပူးပေါင်း ဆောင်ရွက်သွားမယ်။ နောက်တစ်ခုကတော့ အာဆီယံအဖွဲ့မှာ မြန်မာနိုင်ငံဆိုင်ရာအပေါ်မှာ တောင်းဆိုထားတဲ့ မူ (၅) ချက်ကို လိုက်နာဖို့အတွက်လည်း ပူးပေါင်းဆောင်ရွက်သွားမယ်။ လက်ရှိ မြန်မာပြည်သူများနဲ့ စစ်ဘေးရှောင်ပြည်သူတွေကို ကူညီထောက်ပံ့စေချင်တယ်ပေါ့။ အဲ့ဒါတွေကိုလည်း စကစကနေပြီးတော့ ခွင့်ပြုပေးသွားဖို့လည်း သူပြောသွားတာတွေရှိပါတယ်။
မေး- ဂျပန်အစိုးရမဟုတ်တဲ့ ဂျပန်ပြည်သူလူထုတွေအနေနဲ့ကတော့ မြန်မာ့နိုင်ငံရေးမှာ စိတ်ဝင်စားမှုနဲ့ ရပ်တည်ချက်ကကော ဘယ်လိုတွေ ရှိနေလဲ။
ဖြေ-အဲ့ဒါက သတင်းဌာနအသီးသီးက ပုံစံအမျိုးမျိုးနဲ့ သတင်းလွှင့်နေတာကော ဂျပန်ရောက် ပြည်သူများ အနေနဲ့လည်း ပုံစံအမျိုးမျိုးနဲ့ မှန်ကန်တဲ့ သတင်းအချက်အလက်များ ပေးတဲ့အပေါ်မှာ ဂျပန်ပြည်သူများကလည်း တဖက်က သူတို့ အတတ်နိုင်ဆုံး ပါဝင်ဆောင်ရွက်ကြတဲ့ သူရှိသလို ပါဝင်လှူဒါန်းတဲ့ သူများလည်း အများကြီးရှိတာတွေ တွေ့ရပါတယ်။ အားလုံးတော့မ ဟုတ်ပေမဲ့ ဂျပန်ပြည်သူ အများစုက မြန်မာ့အရေးကို စိတ်ဝင်စား အာရုံပြုတဲ့သူရှိသလို တချို့က ကန့်ကွက်ဆန္ဒပြမှုတွေ ပုံစံအမျိုးမျိုးနဲ့ ငွေကြေးဖြတ်တောက်မှုတွေနဲ့ စကစကို ရှုတ်ချရေးတွေမှာလည်း ကိုယ်တိုင်ကိုယ်ကျ ပါဝင်ကြတဲ့ ဂျပန်များလည်းရှိပါတယ်။
မေး- လေးကေ့ကော်မြို့သစ်မှာက ဂျပန်အစိုးရရဲ့ ထောက်ပံ့မှု တော်တော်များများလည်းပါဝင်တာပေါ့။ ဒါပေမဲ့ တလောကဖြစ်သွားတဲ့ လေးကေ့ကော်မြို့သစ်က ထိုးစစ်ဆင်တိုက်ခိုက်မှုတွေနဲ့ပတ်သက်ပြီး ဂျပန်အစိုးရရဲ့ သဘောထားတွေ ပြောဆိုချက်တွေ ဘာတွေ ကြားသိရတာမျိုးရှိလဲ။
ဖြေ-ဂျပန်အစိုးရ အနေနဲ့ကတော့ ပွင့်ပွင့်လင်းလင်းပြောရရင် အဲ့ဒီ လေးလေ့ကော်မြို့သစ် မတည်ဆောက်ခင် နဲ့ အဲ့ တည်ဆောက်ရေး ကိစ္စတချို့မှာ ကျနော်လည်း အရင်က ပါဝင်ခဲ့တာရှိပါတယ်။ မစခင်ပေါ့နော်။ စပြီးသွားတဲ့ နောက်မှာတော့ ခွင့်ပြုချက် ရယူနိုင်တဲ့ သူတွေနဲ့ ပူးပေါင်းပြီးတော့ ဆောက်ယူသွားတဲ့အပေါ်မှာ ကျနော်တို့ အပိုင်းက တစ်ဖက်က ကောင်းတာမြင်သလို အခြေအနေအရ စကစဘက်က လမ်းဖောက်ချင်တဲ့ ကိစ္စမျိုးပဲ ကျနော်တို့က မြင်တာရှိပါတယ်။ ဂျပန်အစိုးရ အနေနဲ့က အဲ့အချိန်တုန်းက ဒုက္ခသည် ပြန်လည် နေရာချထားရေး တို့ ဒေသတွင်းဖွံ့ဖြိုးရေးကို NCA နဲ့ တစ်ပြိုင်နက်လုပ်ဆောင်ချင်တဲ့အချိန်ဖြစ်တဲ့အတွက်ကြောင့် ကျနော်တို့ ဆာဇာခါဝါကို အထူးသံတမန်အနေနဲ့ ခန့်အပ်တာရှိပါတယ်။ ဒါပေမဲ့ လေးကေ့ကော် မှာဖြစ်ပြီးတဲ့ ကိစ္စရဲ့ နောက်ပိုင်းမှာ ဆာဇာခါဝါ သွားတဲ့ဟာမှာ အများအားဖြင့် လူတွေ Miss ဖြစ်သွားတာတွေရှိပါတယ်။ အဲ့ဒီ အချိန်မှာ ဂျပန်အစိုးရက အဲ့ဒီနောက်ပိုင်းသွားတဲ့ အခေါက်တွေမှာကျတော့ သူတို့လွှတ်တာလည်းမဟုတ်ဘူး။ သူတို့ကို တာဝန်ယူထားတဲ့ သံတမန်မဟုတ်ဘူးလို့လည်း သူတို့က ငြင်းထားတာရှိပါတယ်။ အဲ့အတွက်ကြောင့်မို လို့ လေးကေ့ကော်ဖြစ်စဉ်အတွက် ကျနော်တို့ ဒီမှာရှိနေတဲ့ အဖွဲ့အစည်းများ လက်မှတ်ထိုးပြီးတော့ နိုင်ငံခြားရေး ဝန်ကြီးကော ဝန်းကြီးချုပ်ကော စာရေးပြီးတော့မှ တောင်းဆိုထားတာတွေရှိပါတယ်။ ပြီးတော့ ဆာဇာခါဝါ ကနေပြီးတော့ ကေအဲန်ယူက PDF တွေကို လက်ခံလို့ ဒီကိစ္စဖြစ်ရတယ်ဆိုတဲ့ အပြစ်တင်တဲ့ လေသံမျိုးနဲ့ ပြောတဲ့ ကိစ္စကိုလည်း ဆာဇာခါဝါကိုကော၊ ဂျပန်ဝန်ကြီးဌာနကိုကော ကျနော်တို့ သေချာပြောပြထားပါတယ်။
မေး- အာဏာသိမ်းပြီးတဲ့နောက်ပိုင်း ဖြစ်ပေါ်နေတဲ့ စစ်ကောင်စီရဲ့ လူ့အခွင့်အရေးချိုးဖောက်မှုမျိုးစုံအပေါ်မှာ ဂျပန်အစိုးရရဲ့ ရပ်တည်ချက် အပေါ်မှာ အားမလိုအားမရတဲ့ဟာတွေ ဘာတွေရှိမလဲ။ ပြီးတော့ ဘယ်လိုရပ်တည်သင့်လဲလို့ ထင်လဲ။
ဖြေ-အဲ့ဒါကတော့ ရိုးရိုးလေးပါပဲ။ သူတို့ အနေနဲ့ မြန်မာပြည်သူများရဲ့ အသံကို နားထောင်သင့်ပါတယ်။ စကစနဲ့ ပတ်သက်တဲ့ ဆက်သွယ်ဆောင်ရွက်မှုတွေလည်း သူတို့ ရပ်တန့်သင့်ပါတယ်။ ပြောရမယ်ဆိုရင်တော့အမျိုးစုံ ပေါ့။ ဂျပန်က ဝင်ထားတဲ့ ရင်နှီးမြှပ်နှံမှုတွေလည်း အတတ်နိုင်ဆုံး ရပ်တန့်သင့်ပါတယ်။ ဒါပေမဲ့ ဒါကိုလည်း ကျနော်အပါ အဝင် ဂျပန်ရောက် မြန်မာပြည်သူတွေကလည်း အားတက်သရော ဝိုင်းဝန်းလုပ်ဆောင်နေတာတွေ ရှိပါတယ်။
မေး- နောက်ဆုံးအနေနဲ့ မေးချင်တာက NUG ရဲ့ ဂျပန်ဆိုင်ရာ ကိုယ်စားလှယ်အနေနဲ့ ရှေ့ဆက် ဘာတွေ လုပ်ဆောင်သွားဖို့ ပြင်ဆင်ထားပြီးတော့ ဘယ်လောက်ထိ လုပ်ဆောင်သွားနိုင်မယ်လို့ မျှော်လင့်ထားသလဲ။
ဖြေ-NUG ဖွဲ့စည်းပြီးတဲ့ အချိန်မှာ အတိုချုံးပြောရရင် ၅ လပိုင်းမရောက်ခင် အဲ့အချိန် စပ်ကြားမှာပဲ ဂျပန်နဲ့ NUG ကြားထဲမှာ Contact person အနေဖြင့် လုပ်ပေးပါဆိုလို့ Contact Person အနေဖြင့် NUG နဲ့ ဂျပန် အကြားမှာ တံတားတစ်ခုအနေဖြင့် ဆောင်ရွက်ခဲ့ပါတယ်။ အဲ့ဒီနောက်မှာ ကိုယ်စားလှယ် ခန့်အပ်ခြင်းဆိုင်ရာကိစ္စတွေ ဆွေးနွေး တာတွေရှိတယ်။ လုပ်ဖို့ရော လုပ်ရင်ဘယ်လိုဖြစ်မလဲ အတည်ပြုပေးတာတွေရော ရပြီးတဲ့အခါမှာ ပထမတုန်းက Contact Person အနေနဲ့ ဒီလိုပဲ လုပ်ပေးနေနိုင်တာတွေ ရှိတာပေါ့။ အခု ကိုယ်စားလှယ်အနေနဲ့ လည်း ဒီလုပ်နေကျဟာကိုပဲ ဆက်လုပ်ပေးဖို့ ရှိတယ်လို့ပဲ ခံယူပါတယ်။ ဒါပေမဲ့ ခုနက ကိုယ်စားလှယ် အနေနဲ့ ပြောတော့ ဒီဟာထက်တော့ တာဝန်ပိုကြီးလာပါတယ်။ ကျနော်ထက်တော်တဲ့ ပရော်ဖက်ဆာကော ဆုပေါင်းများ စွာ ရထားတဲ့သူလည်းတစ်ယောက်ထဲ လုပ်လို့မရနိုင်ပါဘူး။
အဲ့ဒီအတွက်ကြောင့် ဂျပန်မှာရှိတဲ့ အရင်ကတည်းက အမြဲတမ်းပူးပေါင်းဆောင်ရွက်ခဲ့တဲ့ ကျနော်တို့ စီနီယာများ အတူတူလုပ်ခဲ့တဲ့သူများ နောက်တစ်ခါ နောက်သစ်ရဲ့ နောက်ပိုင်းမှာ ဖွဲ့စည်းထားတဲ့ လူငယ်အဖွဲ့အစည်းများ သူတို့ ထောက်ခံ ချက်များ ကူညီမှုများနဲ့ ကျနော်တို့ အဖွဲ့အစည်း ဖွဲ့စည်းပြီးသလောက်ရှိပါပြီး။ ဆက်လက်ပြီးတော့ ရုံးနဲ့ ပတ်သက်တဲ့ တာဝန်များကိုလည်း ဆက်လက် လုပ်ဆောင်သွားမှာဖြစ်ပါတယ်။ ဒီမှာလည်းပဲ အများအားဖြင့် အဖွဲ့ (၅၀)၊ (၅၀) ကျော်လောက်ရှိ တယ်။ အဲ့ဒီအဖွဲ့အား လုံးပါဝင်နိုင်မဲ့ Hundred Percent တော့ မပြောတတ်ပေမဲ့ အားလုံးပါဝင်နိုင်မဲ့ အခင်း အကျင်းတစ်ခုနဲ့ လုပ်ဆောင်ဖို့ ကျနော်တို့ အစီအစဉ်ရှိသလို အစီအစဉ်ပြီးတော့ အဖွဲ့အစည်းတစ်ခုပြုပြီးစလည်း ပြုပြီးပါပြီး။ အဲ့ဒီအတွက်ကြောင့်လည်း အများကြီးတော့ မပြောတတ်ပေမဲ့ ကျနော်တို့ လုပ်ဆောင်နိုင်သလောက် အရင်က ရှိပြီးသား အစိုးရ Contact တွေနဲ့ ဂျပန်ထဲမှာရှိတဲ့ Contact သော်လည်းကောင်း နိုင်ငံခြားနဲ့ ပတ်သက်တဲ့ Diplomacy နဲ့ပတ်သက်တဲ့ Politic အဲ့ဒီဟာတွေကိုတော့ ကျနော်တို့ အတတ်နိုင်ဆုံး လုပ်ဆောင်သွားဖို့ အစီအစဉ်ရှိပါတယ်။
