မတ်လ ၂ဝ ရက် ၂၀၂၁ ခုနှစ်။ကေအိုင်စီ
ကရင်ပြည်နယ် မြဝတီမြို့ အမှတ် ၁ ရပ်ကွက် မိုးကုတ်ဈေးတွင် ယနေ့ မနက် ၈ နာရီခန့်က စစ်အာဏာရှင်ဆန့်ကျင်ရေး ဆန္ဒဖော်ထုတ်မှုများ ပြုလုပ်ခဲ့ရာတွင် ပါဝင်သူများအား ရဲနှင့်အုပ်ချုပ်ရေးအဖွဲ့က ရပ်ကွက်တွင်းနေအိမ်ထိ ရှာဖွေဖမ်းဆီးလျက်ရှိပြီး ဖမ်းဆီးခံရသူ လူ ၄ဝ ဝန်းကျင်ခန့်ရှိကြောင်း သိရသည်။
ယနေ့ မတ်လ ၂ဝ ရက် နံနက် ၈ နာရီအချိန်ခန့်က မိုးကုတ်ဈေးအတွင်း ဈေးရောင်းဈေးဝယ်သူ တစ်ချို့မှ စစ်အာဏာရှင်ဆန့်ကျင်ရေးအဖြစ် လက်သုံးချောင်းထောင်ကာ ၁ဝမိနစ်ခန့် ဆန္ဒဖော်ထုတ်ခဲ့ကြပြီးနောက် လူစုခွဲခဲ့ကြသည်။
ထိုသို့ ဆန္ဒဖော်ထုတ်မှုကြောင့် ပါဝင်သူများကို ရဲတပ်ဖွဲ့နှင့် အုပ်ချုပ်ရေးအဖွဲ့မှ ရပ်ကွက်တွင်း နေအိမ်များထိ လိုက်လံဖမ်းဆီးမှုများ ပြုလုပ်ခဲ့ရာ ယနေ့ မွန်းလွဲ၁ နာရီထိနောက်ဆုံးသတင်းအရ လူ ၄ဝ ဝန်းကျင်ခန့် ဖမ်းဆီးခံထားရပြီး ယင်းတို့၏ အမှုကိစ္စနှင့်ပတ်သက်၍ မြဝတီမြို့ပြည်သူ့ရှေ့နေ အဖွဲ့မှ အခမဲ့ အမှုလိုက်ပါဆောင်ရွက်ပေးသွားမည်ဟု သိရသည်။