ဖေဖော်ဝါရီ ၈ ရက်၊၂၀၂၁ ခုနှစ်။ နေနော်
ကရင်ပြည်နယ် မြဝတီမြို့တွင် စစ်အာဏာရှင် ဆန့်ကျင်ရေး ဒုတိယရက်ဆန္ဒပြပွဲတွင် ပြည်သူလူထုအင်အား သောင်းနှင့်ချီပါဝင်လာပြီး ထိုထဲတွင် မြဝတီခရိုင်ဆေးရုံမှ ကျန်းမာရေးဝန်ထမ်း တစ်ချို့လည်း ပူးပေါင်းပါဝင်လာကြောင်း သိရသည်။
ယနေ့ ဖေဖော်ဝါရီလ ၈ ရက် နံနက် ၉ နာရီ အချိန်ခန့်မှစ၍ စစ်အာဏာရှင်ဆန့်ကျင်ရေး ဒုတိယရက်အဖြစ် ဆန္ဒဖော်ထုတ်ခဲ့ကြသည့် ထောင်ဂဏန်းမျှရှိသည့် လူထုဟာ ဘုရင့်နောင်လမ်းမကြီး နှင့် ဗိုလ်ချုပ်လမ်းမကြီးတစ်လျှောက်ချီတက်ဆန္ဒပြခဲ့ရာမှ နံနက် ၁၁ နာရီအချိန်ခန့်တွင် ပိုမိုများပြားလာပြီး သောင်းနှင့်ချီ၍ ရှိလာကာ ထိုထဲတွင် ကျန်းမာရေးဝန်ထမ်းများနှင် ပညာရေးဝန်ထမ်းတစ်ချို့ ပူးပေါင်းပါဝင်လာခြင်းဖြစ်သည်။
ယမန်နေ့ ဖေဖော်ဝါရီ ၇ ရက် နေ့လည်ပိုင်းက သေနတ်ပစ်ဖောက်အကြမ်းဖက်ဖြိုခွဲ ဖမ်းဆီးမှုများ ရှိခဲ့ပြီးနောက် မြဝတီလူထုသည် ပိုမို၍ တက်ကြွလာကြပြီး ယနေ့ စစ်အာဏာရှင်ဆန့်ကျင်ရေး ဆန္ဒပြပွဲဒုတိယရက်တွင် မိုးရွာနေသည့်ကြားမှ လူဦးရေ သောင်းနှင့်ချီ၍ ပါဝင်လာကြခြင်းဖြစ်သည်။
လက်ရှိအချိန်ထိ မြဝတီမြို့မှ ဆန္ဒပြလူစုသည် စစ်အာဏာရှင်ဆန့်ကျင်ရေး ကြွေးကြော်သံများ နှင့် ရှစ်လေးလုံးအရေးတော်ပုံတွင် သီဆိုခဲ့ကြသည့် ကမာ္ဘမကြေဘူး ၊ အရေးကြီးပြီ အစရှိသည့် သီချင်းများ သီဆို၍ ဘုရင့်နောင်လမ်းမကြီးနှင့် ဗိုလ်ချုပ်လမ်းတလျှောက် ဆန္ဒပြလျက်ရှိကြသလို ထိုသို့ အလားတူပင် ကရင်ပြည်နယ် ဖားအံမြို့တွင်လည်း စစ်အာဏာရှင်ဆန့်ကျင်ရေး ဆန္ဒပြပွဲများ ဆင်နွှဲလျက်ရှိကြောင်း သိရသည်။
