ဩဂုတ် ၉ ရက်၊ ၂၀၁၈ ခုနှစ်။ နန့်ဘွားခလိန်
၂၀၁၈-၂၀၁၉ ပညာသင်နှစ်တွင် ဧရာဝတီတိုင်းဒေသကြီးအတွင်း အစိုးရ အခြေခံပညာကျောင်းများတွင် ကရင်တိုင်းရင်းသားစာပေသင်ကြားနေသော ကျောင်းသူ/ကျောင်းသား ဦးရေ ၁၂၃,၆၉၆ ဦး ရှိကြောင်း တိုင်းဒေသကြီး ပညာရေးမှူးရုံးမှ သိရသည်။
ဧရာဝတီတိုင်းဒေသကြီးအတွင်း ကရင်တိုင်းရင်းသားစာပေသင်ကြားမှုမှာ ယခင်နှစ် ၂၀၁၇-၁၈ ပညာသင်နှစ်တွင် ၉၁,၈၇၁ ဦးရှိခဲ့ရာမှ ယခု စာသင်နှစ်တွင် ကျောင်းသားဦးရေ ၃၁,၈၂၅ ဦးအထိ တိုးတက်လာခြင်းဖြစ်သည်။
ဧရာဝတီတိုင်းပညာရေးမှူးရုံးမှ ဒုတိယညွှန်ကြားရေးမှူး မန်းသိန်းကျော်က“ ဧရာဝတီတိုင်းမှာ ကရင်လူမျိုး တွေ အများကြီးနေထိုင်ကြတယ်။ အစိုးရကလည်း တရားဝင်ခွင့်ပြုထားတဲ့အတွက်ကြောင့် အခြေခံ ပညာ ကျောင်းတွေမှာ အနောက်ပိုးကရင်စာပေရော၊ စကောကရင်စာပေကိုရော၊ သင်ကြားမယ့်စာသင် ကျောင်း တွေရော၊ ကျောင်းသူ/ကျောင်းသားတွေရော အရင်နှစ်ကထက် ဒီနှစ်က ပိုများလာတယ် ” ဟု ကေအိုင်စီသို့ ပြောသည်။
ယခုနှစ် ကရင်တိုင်းရင်းသားစာပေ သင်ကြားမှုတွင် ပိုးကရင်စာပေသင်ကြားသည့် စာသင်ကျောင်း ၉၃၄ ကျောင်းမှ ကျောင်းသူ/ကျောင်းသား ၇၄,၂၇၄ဦး၊ စကောကရင်စာပေ သင်ကြားသည့် စာသင်ကျောင်း ၆၅ဝ ကျောင်းမှ ကျောင်းသူ/ကျောင်းသား ၄၉,၄၂၂ဦး နှင့် ပိုးကရင် စာပေသင် ဆရာ/ဆရာမ ၂,၂၁၈ ဦး ၊ စ ကောကရင် စာပေသင်ဆရာ/ဆရာမ ၁,၅၉၂ ဦးရှိကြောင်း ဧရာဝတီတိုင်းပညာရေးမှူးရုံး၏ စာရင်းများအရ သိရသည်။
ယခင် ၂၀၁၇-၁၈ ပညာသင်နှစ်တွင် ဧရာဝတီတိုင်းဒေသကြီး အတွင်းရှိ ကရင်စာပေသင်ကြားမှုမှာ ပိုးကရင် စာသင်ကျောင်း ၇၂၁ ကျောင်းမှ ကျောင်းသူ/ကျောင်းသား ၅၂,၂၀ဝဦးနှင့် ဆရာ/ဆရာမ ၁,၄၄ဝဦး၊ စ ကော ကရင် စာသင်ကျောင်း ၅၃၆ ကျောင်းမှ ကျောင်းသူ/ကျောင်းသား ၃၉,၆၇၁ ဦး နှင့် ဆရာ/ဆရာမ ၁,၂၅၆ ဦးရှိခဲ့သည်ဟု တိုင်းပညာရေးမှူး စာရင်းတွင် ဖော်ပြထားသည်။
ထို့အပြင် ယခုစာသင်နှစ်တွင် တိုင်းဒေကြီးအတွင်း နေထိုင်ကြသည့် အခြားတိုင်းရင်းသားစာပေများလည်း သင်ကြားလျက်ရှိရာ အရှိချင်း တိုင်းရင်းသားစာပေသင်ကြားသူ ၁,၆၂၂ဦး နှင့် ရခိုင်တိုင်းရင်းသား စာပေ သင်ကြားသူ ၃,၇၃၆ ဦးရှိကြောင်း သိရသည်။
