မတ် ၈ရက်၊ ၂၀၁၆ခုနှစ်။ နန်းဝေဖြိုးဇာ
ကရင်အမျိုးသား ဘာသာစကားအားလုံး အသံထွက်နိုင်သည့် လိုက်ခွေါင်ကော်စာ ပိဋကတ်စာပေ အမည်ရှိ စာပေအသစ်တစ်မျိုးကို လိုက်ခွေါင်ကော်စာ ပိဋကတ်စာပေပြန့်ပွားတိုးတက်ရေးသမဂ္ဂက ကရင်ပြည်နယ် ဖားအံမြို့နယ် ရွှေလှှိုင်တိုက်ကျောင်း၌ မတ်လ ၈ရက်နေ့တွင် စတင်မိတ်ဆက်ပွဲ အခမ်းအနားတစ်ခု ပြုလုပ်ခဲ့သည်။
လိုက်ခွေါင်ကော်စာ ပိဋကတ်စာပေပြန့်ပွားတိုးတက်ရေးသမဂ္ဂမှ အကြံပေးတာဝန်ခံ စောမောင်ကြီးက “ဒီစာပေ ကို စတင်မိတ်ဆက်ရခြင်းကြောင်းရင်းကတော့ နိုင်ငံတော်မှ အသိမှတ်ပြုနိုင်တဲ့ စာပေအဖြစ် မှတ်ပုံတင်နိုင်ဖို့ ဆွေးနွေးပြီး တက်ရောက်သူများ၏ အကြံပြုချက်တောင်းခံခြင်းဖြစ်ပါတယ်။ စာပေဟာ ကရင်တစ်မျိုးသား လုံးရဲ့ ဘာသာစကားများအားလုံးကို အသံထွက်နိုင်တဲ့ စာပေဖြစ်တာကြောင့် ဘုံစာပေအဖြစ် သွားချင်လို့ ကျနော်တို့ မှတ်ပုံတင်ဖို့ ကြိုးစားတာဖြစ်တယ်”ဟု ကေအိုင်စီသို့ ပြောသည်။
ယခု လိုက်ခွေါင်ကော်စာပေသည် ခန္ဓာကိုယ်အစိတ်အပိုင်း အခေါ်အဝေါ်များကို သုံးစွဲပြီး ဗျည်း(၃၈) လုံးနှင့် အက္ခရာ(၄၆)လုံး ရှိပြီး လက်ရှိအချိန်တွင် အရှေ့ပိုး(ဖလုံ)၊ စဝေါ်(စကော)၊ အနောက်ပိုး(ဖလုံး)အပြင် မြန်မာ ဘာသာပါ အသံထွက်ရေးနိုင်ကြောင်း၊ ကိုးရီးယား၊ ဂျပန်၊ တရုတ်စာပေများနှင့် အနည်းငယ် ဆင်တူကြောင်း ၎င်းစာပေကို ပြန်လည် ပြုစုထားသည့် ကော့စာဂလိုကျေးရွာမှ ရွှေဖလားတိုက်ကျောင်းဆရာတော် ဘန္ဒစန္ဒာဝရ က မိန့်ကြားသည်။
“ဒီစာပေက မြိုင်ကြီးငူမှ ထွက်တဲ့ စာပေမဟုတ်ဘူး။ နှစ်ပေါင်း၅ထောင်လောက်ကတည်းက ရှိတဲ့ စာပေလို့ သိရတယ်။ ထိုင်းနိုင်ငံချင်းမိုင်မှာ ကရင်တွေရှိတဲ့ ဖားဘာခို့နေရာမှာ ပြန်ပေါ်လာတယ်။ ပြီးတော့မှ ထိုင်းမြန်မာ နယ်စပ်ဒေသမှာ အဲဒီစာပေပြန်ရောက်ရှိပြီး ဘုန်းကြီးတို့က အဲဒီမှာ ဒီစာပေရရှိဖို့ သွားသင်ယူရတယ်။ အဂင်္လိပ် သက္ကရာဇ် ၂ထောင်ခုနှစ်မှာ မြိုင်ကြီးငူဆရာတော်က ပြန်ဖော်ထုတ်တာ၊ ဦးဇင်းကတော့ ၁၉၉၆ခုနှစ်ကတည်းက ဒီကော့စာကလိုရွာမှာ ပြန်ဖော်ထုတ်တာ”ဟု ဘန္ဒစန္ဒာဝရက မိန့်ကြားသည်။
ရွှေလှှိုင်တိုက်ကျောင်း၌ ပြုလုပ်သည့် လိုက်ခွေါင်ကော်စာပေမိတ်ဆက်ပွဲ အခမ်းအနားတွင် ကရင်စာပေဆိုင်ရာ ကိုယ်စားလှယ်များနှင့် ဒေသခံ စုစုပေါင်း ၃၀ဝ ကျော်တက်ရောက်ခဲ့ပြီး ကရင်ပြည်နယ် စာပေနှင့် ယဉ်ကျေးမှုကော်မတီမှ တက်ရောက်ခြင်းမရှိကြောင်း သိရသည်။
၎င်းစာပေအပေါ် ကရင်ပြည်နယ် စာပေနှင့် ယဉ်ကျေးမှုကော်မတီ ဥက္ကဌ စောအေးမြက “လောလောဆယ်မှာ ဘယ်ကရင်စာကို သင်ပါ။ တစ်ခုတည်း သင်ပါလို့ သွားပြောမရဘူး။ စိတ်ကြိုက်သင်လို့ ရတယ်။ တချိန်ချိန်မှာ ကရင်စာတစ်ခုတည်းဖြစ်ဖို့တော့ မျှော်မှန်းထားတာပေါ့။ ဖြစ်၊ မဖြစ်တော့ မသိဘူး။ အခု ကရင်တွေ စာပေများမယ်၊ အဖွဲ့အစည်းတွေ များမယ်၊ နိုင်ငံရေးပါတီတွေ များမယ်။ ဒါတွေက ကောင်းတဲ့ အလားအလာတော့ မဟုတ်ဘူး”ဟု ကေအိုင်စီသို့ မှတ်ချက်ပြု ပြောဆိုသည်။
ယခု လိုက်ခွေါင်ကော်စာပေသည် သက္ကရာဇ် ၂၀၀ဝ ခုနှစ်မှ ပြန်လည်ပြန့်ပွားလာသည့်အတွက် ကရင်တိုင်းရင်းသားအများစုသည် မည်သည့် မျိုးနွယ်စုမှ ကိုယ်စားပြုသည့်စာပေဟု မသိရသောကြောင့် လက်မခံနိုင်သူများရှိသလို သမိုင်းအထောက်အထား တိတိကျကျ သိချင်သူများလည်း ရှိသည်ဟု သိရသည်။
လိုက်ခွေါင်ကော်စာ ပိဋကတ်စာပေပြန့်ပွားတိုးတက်ရေးသမဂ္ဂကို ပြီးခဲ့သည့် ၂၀၁၅ ခုနှစ်၊ ဇန်နဝါရီ ၁၅ရက်နေ့တွင် ဖွဲ့စည်းခဲ့သည်။