ဖေဖော်ဝါရီ ၁ဝ ရက်၊ ၂၀၁၇ ခုနှစ်။ စောထွန်းလင်း
အစိုးရနှင့် တိုင်းရင်းသားလက်နက်ကိုင် အဖွဲ့များအကြား အပစ်ရပ်ကာလအတွင်း နှစ်ဖက်တပ်နယ်မြေသတ်မှတ် နိုင်ရေးအတွက် ကော်မတီ အသီးသီးဖွဲ့စည်းကာ သီးခြားဆွေးနွေးသွားမည်ဟု ပြည်ထောင်စုအဆင့် ပစ်ခတ် တိုက်ခိုက်မှု ရပ်စဲရေးဆိုင်ရာ ပူးတွဲကော်မတီ အတွင်းရေးမှူး-၁ ဒေါက်တာရွှေခါးက ပြောသည်။
အဆိုပါ ပြည်ထောင်စုအဆင့် ပစ်ခတ်တိုက်ခိုက်မှု ရပ်စဲရေးဆိုင်ရာ ပူးတွဲကော်မတီ-JMC ၏ နဝမ အကြိမ် မြောက်အစည်းအဝေးကို ရန်ကုန်မြို့၊ ရွှေလီလမ်းရှိ၊ အမျိုးသားပြန်လည်သင့်မြတ်ရေးနှင့် ငြိမ်းချမ်းရေး ဗဟိုဌာန -NRPC ၌ ဖေဖော်ဝါရီ ၆ ရက်မှ ၉ ရက်နေ့ထိ ပြုလုပ်ခဲ့ပြီး အစည်းအဝေးအပြီး သတင်းမီဒီယာများနှင့်တွေ့ဆုံစဉ် ဒေါက်တာရွှေခါးက အခုလို ပြောဆိုခဲ့ခြင်းဖြစ်သည်။
၎င်းက “ နှစ်ဖက်တပ်နယ်မြေ သတ်မှတ်နိုင်ရေး ကိစ္စဆွေးနွေးနိုင်ဖို့က သက်ဆိုင်ရာနယ်မြေတွေမှာ ရှိတဲ့ စစ်ဘက်ဆိုင်ရာ တာဝန်ခံတွေနဲ့ ညှိနှိုင်းနိုင်တယ်။ အဲ့ဒါကြောင့် ဒီကိစ္စကို အမြန်ဆုံးလုပ်ဖို့ ဆွေးနွေးထား ပါတယ်။ နောက်တခုကတော့ ဥပမာ-ကေအဲန်ယူမှာဆိုရင် ဒီကိစ္စကို သီးသန့်ဆွေးနွေးဖို့ ကော်မတီတွေဖွဲ့ ထား ပြီးပါပြီး။ မကြာခင်မှာ အစိုးရဘက်ကလည်း အမြန်ဆုံးကော်မတီဖွဲ့ပြီးတော့ ကော်မတီနှစ်ရပ်က အချင်းချင်း တွေ့ကြမှာ ဖြစ်ပါတယ်။ ကျနော်တို့ JMC ကတော့ နှစ်ဖက်ကော်မတီတွေ့နိုင်ဖို့ အကျိုးဆောင် လုပ်ပေးရမှာဖြစ်ပါ တယ်” ဟု ဖေဖော်ဝါရီ ၉ ရက်နေ့တွင် ပြောသည်။
ထို့အပြင် ၄ ရက်ကြာပြုလုပ်ခဲ့သည် JMC အစည်းအဝေးတွင် နှစ်ဖက်တပ်နေရာချထားရေးကိစ္စ၊ တပ်ပိုင်းဆိုင်ရာ လုပ်ထုံးလုပ်နည်းဆိုင်ရာများ၊ မှိုင်းရှင်းလင်းရေးကိစ္စရပ်များ၊ ဒေသန္တရဆိုင်ရာ အပစ်ရပ် ပူးတွဲ စောင့်ကြည့်ရေး JMC-S များဖွဲ့စည်းရေးနှင့် ရံပုံငွေ (ဘတ်ဂျက်) ကိစ္စရပ်များကို ဆွေးနွေးခဲ့သည်ဟု JMC အတွင်းရေးမှူး အဖွဲ့ဝင် များထံမှ သိရသည်။
JMC အတွင်းရေးမှူး-၂ ဗိုလ်မှူးကြီးဝဏ္ဏအောင်က “ နယ်မြေသတ်မှတ်ရေးနဲ ့ပတ်သက်ပြီးတော့ JMC-S တွေမှာ ညှိနှိုင်းဆောင်ရွက်သွားဖို့ ဒါလေးတွေ ဆုံးဖြတ်ခဲ့ ကြပါတယ်။ မှိုင်းနဲ့ပတ်သက်ပြီးတော့လည်း အများပြည်သူ သွားလာတဲ့နေရာတွေပေါ့ အဓိကမှိုင်းရှင်းလင်းရေးကို ဦးစားပေးဆောင်ရွက်သွားဖို့ ဆွေးနွေးခဲ့ပါတယ်။ အသေး စိတ်ကတော့ ထပ်မံပြီးတော့ ဆွေးနွေးသွားဖို့ ရှိပါတယ်” ဟု မီဒီယာများနှင့် တွေ့ဆုံစဉ် ပြောသည်။
လက်ရှိ တစ်နိုင်ငံလုံးပစ်ခတ်တိုက်ခိုက်မှု ရပ်စဲရေး သဘောတူစာချုပ် -NCA အရ တိုင်းရင်းသား လက်နက်ကိုင် အဖွဲ့များနှင့် အစိုးရတို့အကြား ပစ်ခတ်တိုက်ခိုက်မှု ပူးတွဲစောင့်ကြည့်ရေး ကော်မတီ -JMC ကိုဖွဲ့စည်းထားသော်လည်း JMC တွင် စိန်ခေါ်မှုများ ရှိနေပြီး အချို့ကိစ္စများတွင် နယ်မြေပိုင်းခြား သတ်မှတ်ထားသော်လည်း သဘောထားကွဲလွဲမှုများ ရှိနေသေး သည်ဟု ယူဆရကြောင်း JMC ဒုဥက္ကဌ၊ ကရင်အမျိုးသားလွတ်မြောက်ရေးတပ်မတော် -KNLA စစ်ထောက်ချုပ် ဗိုလ်ချုပ် စောအိုင်းဇက်ဖိုးက ပြောဆိုထားသည်။
NCA စာချုပ်အရ ဖွဲ့စည်းထားသည့် ပစ်ခတ်တိုက်ခိုက်မှု ပူးတွဲစောင့်ကြည့်ရေး ကော်မတီ အနေဖြင့် နှစ်လ တစ်ကြိမ် အစည်းအဝေးပြုလုပ်လေ့ရှိပြီး ၁ဝ ကြိမ်မြောက် အစည်းအဝေးကို လာမည့် ဧပြီလ ၃ ရက်မှ ၅ ရက်နေ့ထိ နေပြည်တော် NRPC ရုံးသစ်တွင် ပြုလုပ်ရန် လျာထားကြောင်း သိရသည်။