မေ ၁၉ ရက်၊ ၂၀၂၅ ခုနှစ်။ ကေအိုင်စီ
ထိုင်း-မြန်မာနယ်စပ်အနီးရှိ စစ်ကောင်စီ၏ ခြေလျင်တပ်ရင်း ခလရ-၂၄ ခြေကုပ်ယူထားသော မော်ဖိုးကေစခန်းကို ယနေ့ မေလ ၁၉ ရက်နေ့ မွန်းလွဲပိုင်းမှစတင်ပြီး ကရင်အမျိုးသားလွတ်မြောက်ရေးတပ်မတော်-KNLA ပူးပေါင်းတပ်များက ဆက်လက်တိုက်ခိုက်လျက်ရှိကြောင်း မြေပြင်သတင်းအရ သိရသည်။
KNLA၊ ကရင်အမျိုးသားကာကွယ်ရေးတပ်ဖွဲ့-KNDO တို့ပါဝင်သည့် ပူးပေါင်းတပ်ဖွဲ့က ကရင်အမျိုးသားအစည်း အရုံး-ကေအဲန်ယူ တပ်မဟာ(၇)ထိန်းချုပ်နယ်မြေ၊ ဖားအံခရိုင်၊ ပိုင်ကျုံမြို့နယ်ရှိ နယ်စပ်ခြေ ကုပ်စခန်းများကို ၃ လအတွင်း ဆက်တိုက် တိုက်ခိုက်လာရာ ပြီးခဲ့သည့် မေလ ၁၆ ရက်နေ့ကအထိ စစ်ကောင်စီ၏ မော်ကွီးလုစခန်းကို နောက်ဆုံးသိမ်းယူရရှိထားသည်။
မကြာသေးမီက စခန်းသိမ်းတိုက်ပွဲများကဲ့သို့ မော်ဖိုးကေစခန်းကိုလည်း KNLA ပူးပေါင်းတပ်မှ ဒရုန်းများအသုံးပြု တိုက်ခိုက်နေခြင်းဖြစ်သည်ဟုလည်း စစ်မြေပြင်သတင်းအရင်းအမြစ်က ဆိုသည်။
ကေအဲန်ယူအနေဖြင့် နယ်မြေတွင်း စစ်ကောင်စီတပ်စခန်းများကင်းစင်ရေးကို အဓိက ရည်မှန်းချက်ထား၍ လုပ်ဆောင်နေခြင်းဖြစ်ကြောင်း ယခုလိုနယ်စပ်စခန်းများ တောက်လျှောက်သိမ်းပိုက်ရရှိမှုအပေါ် ကေအဲန်ယူ ပြောခွင့်ရ ပဒိုစောကလယ်စေးက မေလ ၁၆ ရက်နေ့က လူထုနွေဦးသတင်းဌာန၏ မေးမြန်းမှုအား ဖြေကြားထားသည်။
ထို့အပြင် တိုက်ပွဲကြောင့် ထိုင်းနိုင်ငံ မယ်လမြို့နယ်ခွဲအတွင်း စစ်ဘေးရှောင် ၂၁၇ ဦး ဝင်ရောက်လာသည်ဟုလည်း ထိုင်းမီဒီယာများနှင့်အာဏာပိုင်အချို့၏လူမှုကွန်ရက်မီဒီယာမှ ဖော်ပြချက်အရ သိရသည်။ အမျိုးသမီးများ၊ ကလေးငယ်အများစုပါဝင်နေသည့် စစ်ရှောင်များကို အာဏာပိုင်များက အကူအညီပေးထားသည်ဟု ဆိုသည်။
KNLA ပူးပေါင်းတပ်က လပိုင်းအတွင်း တပ်မဟာ(၇) နယ်စပ်တစ်လျှောက်ရှိ မော်ဖားသူ၊ တာလယ်၊ တခေါ်ဘီခွီး၊ ပူလူတူ၊ ခလယ်ဒေး၊ မော်ကွီးလု၊ လေးဂေါ် အစရှိသည့် စစ်ကောင်စီ၏တပ်စခန်းများကို သိမ်းယူထားပြီးဖြစ်သည်။
