ဩဂုတ် ၁၂ရက်၊ ၂၀၁၇ ခုနှစ်။ စောထွန်းလင်း
ဧရာဝတီတိုင်းဒေသကြီး၊ ကန်ကြီးထောင့်မြို့နယ် (ယခင်ပုသိမ်မြို့နယ် အတွင်း)ရှိ ကရင့်အာဇာနည်ပုဂ္ဂိုလ် ကြီး စောဘဦး ဇာတိ ဘဲဂရက်ကြီးရွာ၊ အာဇာနည် ကျောက်တိုင်ရှေ့၌ ၆၇ နှစ်မြောက် ကရင့် အာဇာနည်နေ့အခမ်းအနားကို ယနေ့ နံနက်ပိုင်းတွင် ကျင်းပလျက်ရှိသည်။
အဆိုပါ အခမ်းအနားကို ကရင့်အာဇာနည်နေ့ ကျင်းပရေးကော်မတီ ( ဘဲဂရက်ရွာ) က ဦးဆောင် ကျင်းပခြင်းဖြစ်ပြီး အခမ်းအနားသို့ ကေအဲန်ယူ -ကရင်အမျိုးသားအစည်းအရုံး ပို့ဆောင်ရေးဌာန တာဝန်ခံ ပဒိုစောစိုးစိုး၊ KNLA တွဲဖက် စစ်ရေးချုပ် ဗိုလ်ချုပ် မန်းရှာထုဝေါ် ၊ ကရင်အမျိုးသားပါတီ တာဝန်ရှိသူများ ၊ အနယ်နယ်အရပ်ရပ်မှ ဧည့်သည်များ၊ ဒေသခံများ စုစုပေါင်း ၅၀ဝ ဦးကျော် တက်ရောက်ခဲ့သည်။
ကျင်းပရေးကော်မတီ ဥက္ကဌ မန်းစန်းဝင်းက “ ကျနော်တို့အနေနဲ့ အာဇာနည်ခေါင်းဆောင်ကြီးရဲ့ရွာမှာ ကျင်းပ ချင်တာကြာပြီး၊ ပြောင်းလဲလာတဲ့ ခေတ်အခြေအနေအရ လုပ်ဖြစ်သွားတာပါ။ အားလုံးကလည်း ဒီမှာ လုပ်ချင်ကြပါတယ်” ဟု ကေအိုင်စီသို့ပြောသည်။
ယနေ့ပြုလုပ်သည့် အခမ်းအနားကို အစီစဉ်အပိုင်းသုံးပိုင်းဖြင့် ကျင်းပခဲ့ပြီး နံနက် ၈ နာရီတွင် အာဇာနည် များကို ရည်စူးဝတ်ပြုဆုတောင်းခြင်း၊ ဒုတိယပိုင်းတွင် လွမ်းသူ့ပန်းခွေချ အလေးပြုခြင်းနှင့် တတိယပိုင်းတွင် ဟောပြောပွဲ အခမ်းအနား (လက်ရှိသတင်းရေးနေစဉ်)ဆက်ပြုလုပ်လျက်ရှိသည်။ စောဘဦးကြီး ဇာတိရွာတွင် ယခင်နှစ်က အာဇာနည်ကျောက်တိုင်ဖွင့်ပွဲ အခမ်းအနားပြုလုပ်ခဲ့ဖူးပြီး ယခု ဒုတိယအကြိမ် ကျင်းပခြင်းဖြစ်သည်။
