မေလ ၁၄ ရက်၊ ၂၀၂၁ ခုနှစ်။ ကေအိုင်စီ
ကရင်ပြည်နယ်၊ ဘုရားသုံးဆူမြို့တွင် ယနေ့(မေ ၁၄) နံနက်က စစ်အာဏာရှင် ဆန့်ကျင်ရေးလှုပ်ရှားမှုအတွင်း ပါဝင်သည့် အမျိုးသမီးနှစ်ဦးကို စစ်ကောင်စီတပ်မှ ဖမ်းဆီး ခေါ်ဆောင်သွားသည်ဟု သိရသည်။
ဘုရားသုံးဆူမြို့ စစ်အာဏာရှင်ဆန့်ကျင်ရေးသပိတ်ပြုလုပ်ပြီးနောက် နေအိမ်တွင် ပြန်နေထိုင်စဉ် ဒေါ်ဇင်မာဦးနှင့် ၎င်း၏ နေအိမ်၌ ရှိနေသည့် အမျိုးသမီးတစ်ဦးကို စစ်ကောင်စီ၏ ရဲတပ်ဖွဲ့ဝင်နှင့် စစ်တပ်တို့က လာရောက်ဖမ်းခေါ်ဆောင်သွားသည်ဟု ဒေသခံတစ်ဦးက ယခုလိုပြောသည်။
” သပိတ်ပြီးတော့ ဒီမနက်ပဲ သူ့အိမ်မှာလာဖမ်းတာပေါ့နော်။ အဲ့ဒီမှာကောင်မလေးကလည်း ရေဝင်ချိုးတယ်။ ရေချိုးခန်းကိုအတင်းဖွင့်ခိုင်းပြီးတော့ ကောင်မလေးရဲ့ဆွဲကြိုးကိုလည်း မှတ်ထားလားမသိဘူး။ အဲ့မှာဆွဲကြိုး၊ ဆွဲကြိုးဆိုပြီး ဖမ်းခေါ်သွားတယ်။ ” ဟု ၎င်းက ကေအိုင်စီသို့ ပြောသည်။
ထို့အပြင် ဒေါ်ဇင်မာဦး၏ မိသားစုဝင်များလည်း ဘေးကင်းလုံခြုံရာသို့ ရှောင်တိမ်းနေရသည်ဟု နီးစပ်သူများက ပြောသည်။ ထိုင်း-မြန်မာနယ်စပ် မြို့တစ်မြို့ဖြစ်သည့် ဘုရားသုံးဆူမြို့တွင် စစ်ကောင်စီမှ နှောင့်ယှက်မှုများရှိသော်လည်း သပိတ်စစ်ကြောင်း နေ့တိုင်းနီးပါး ထွက်လေ့ရှိပြီး လက်ရှိတွင် ဖမ်းဆီးခံရသူ ၁ဝ ဦးကျော် ရှိပြီးဟု သိရသည်။