ဧပြီလ ၅ ရက် ၂၀၂၁ ခုနှစ်။ ကေအိုင်စီ
ကရင်ပြည်နယ် မြဝတီမြို့တွင် ဖမ်းဆီးခံရသူ လူ ၁၀ဝ ဝန်းကျင်ခန့်အနက်မှ အသက် ၁၈ နှစ်မပြည့်သူများကိုသာ အာမခံဖြင့်လွှတ်ပေးထားပြီး ကျန်သူများကို မြဝတီနှင့်ဖားအံမြို့ရှိ အချုပ်ထောင်တို့တွင် ထိန်းသိမ်းထားကြောင်း သိရသည်။
ပြီးခဲ့သည့် ဖေဖော်ဝါရီလ ဒုတိယအပတ်မှစကာ မတ်လ ၂၇ ရက်နေ့ထိ မြဝတီမြို့တွင် စစ်အာဏာရှင်ဆန့်ကျင်ရေး ဆန္ဒပြမှုများနှင့် စပ်လျဉ်း၍ ဖမ်းဆီးခံရသူ စုစုပေါင်း လူ ၁၀ဝ ဝန်းကျင်ခန့်ရှိခဲ့ခြင်းဖြစ်သည်။
“ အသက် ၁၈ နှစ် မပြည့်သေးသူ ကလေးသူငယ် ၁၅ ယောက်ခန့်ကိုတော့ ကိုယ်ပိုင်ခံဝန်ဖြင့် လွှတ်ပေးထားပါတယ်။ ကျန်ရှိနေတဲ့ အယောက် (၈၀) ဝန်းကျင်ခန့်ကိုတော့ များသောအားဖြင့် ပုဒ်မ ၅၀၅(က) ဖြင့် အမှုဖွင့်ခံရပြီး မြဝတီရဲစခန်းအချုပ်နှင့် ဖားအံမြို့ တောင်က လေးအကျဉ်းထောင်တွေမှာ ထိန်းသိမ်းထားပါတယ်။ အဲ့ဒီကနေတဆင့် မြဝတီတရားရုံးသို့ ရုံးချိန်းတက်နေရတာပါ။ ”ဟု ဆန္ဒပြမှုနှင့် စပ်လျဉ်း၍ ဖမ်းဆီးခံရသူများအား အခမဲ့ ဥပဒေ အကူအညီပေးလျက်ရှိသည့် မြဝတီမြို့ ပြည်သူ့ရှေ့နေများ အဖွဲ့မှ ရှေ့နေတစ်ဦးက ပြောသည်။
လက်ရှိတွင် ၎င်းတို့ အာမခံရရှိရေးအတွက် လျှောက်လွှာတင်ထားပြီး တရားသူကြီး၏ အဆုံး အဖြတ်ကို စောင့်နေဆဲဖြစ်ကြောင်း အခမဲ့ ဥပဒေအကူအညီပေးလျက်ရှိသည့် မြဝတီမြို့ ပြည်သူ့ရှေ့နေများ အဖွဲ့ထံမှသိရသည်။
