နိုဝင်ဘာလ ၉ ရက်၊ ၂၀၂ဝ ပြည့်နှစ်။ နေနော်
ယမန်နေ့ နိုဝင်ဘာ(၈)ရက် က ကျင်းပခဲ့သည့် ပါတီစုံအထွေထွေရွေးကောက်ပွဲ၌ ကရင်ပြည်နယ် မြဝတီမြို့နယ် မဲဆန္ဒနယ်(၁၁)တွင် ဝင်ရောက်ယှဉ်ပြိုင်ခဲ့သည့် လက်ရှိအမျိုးသားလွှတ်တော်ဥက္ကဋ္ဌ မန်းဝင်းခိုင်သန်းသည် ပြိုင်ဘက်ပါတီ ကိုယ်စားလှယ်လောင်းထက် မဲကွာဟမှု ၂ သောင်း ကျော်ဖြင့် အပြတ်အသတ် အနိုင်ရရှိခဲ့ ကြောင်း သိရသည်။
ယမန်နေ့က မဲရေအတွက်မှုအခြေအနေအား ယနေ့ (နိုဝင်ဘာ ၉ ရက်)တွင် ရွေးကောက်ပွဲကော်မရှင်မှ ပုံစံ ၁၉ ဖြင့် ထုတ်ပြန်ကြေငြာရာတွင် အမျိုးသားဒီမိုကရေစီ အဖွဲ့ချုပ် (NLD)ကိုယ်စားလှယ်လောင်း မန်းဝင်းခိုင်သန်း သည် မဲအရေအတွက် (၃၀,၃၅၃) မဲ ရရှိခဲ့ပြီး ပြိုင်ဘက်ပါတီ ပြည်ထောင်စု ကြံ့ခိုင်ဖွံ့ဖြိုးရေးပါတီ(USDP) ပါတီမှ ကိုယ်စားလှယ်လောင်းမှာ(၉,၆၄၅) မဲသာ ရရှိခဲ့၍ မဲကွာဟမှု (၂၀,၇၀၈) မဲဖြင့် မန်းဝင်းခိုင်သန်း က အပြတ်အသတ် အနိုင်ရရှိခဲ့ခြင်းဖြစ်သည်။
၎င်းအပြင် မြဝတီခရိုင်အတွင်းရှိ ပြည်သူ့လွှတ်တော်၊ အမျိုးသားလွှတ်တော် မဲဆန္ဒနယ် (၁၁) နှင့် မဲဆန္ဒနယ် (၁၂) တို့တွင်လည်းကောင်း၊ ကရင်ပြည်နယ်လွှတ်တော် မြဝတီမြို့နယ် မဲဆန္ဒနယ် (၁) နှင့် မဲဆန္ဒနယ် (၂) တို့ တွင်လည်း အမျိုးသားဒီမိုကရေစီအဖွဲ့ချုပ်-NLD ပါတီမှ အသီးသီးအနိုင်ရရှိခဲ့ကြောင်း ရွေးကောက်ပွဲကော် မရှင်၏ ယနေ့ အတည်ပြုထုတ်ပြန်ချက်အရ သိရသည်။
ယမန်နေ့က မြဝတီခရိုင်အတွင်း ကျင်းပခဲ့သည့် ပါတီစုံအထွေထွေရွေးကောက်ပွဲတွင် နိုင်ငံရေးပါတီ ၆ ပါတီမှ ကိုယ်စားလှယ်လောင်း ၂၇ ဦး နှင့် တစ်သီးပုဂ္ဂလကိုယ်စားလှယ်လောင်း ၁ ဦး ဝင်ရောက် ယှဉ်ပြိုင်ခဲ့ကြသည်။ မြဝတီခရိုင်အတွင်းရှိ မဲဆန္ဒရှင်လူဦးရေ (၁၇၂,၀၂၅) ဦး ရှိသည့်အနက် လူဦးရေ (၈၂,၆၄၈) ဦး မဲပေးခဲ့ကြ၍ ရာခိုင်နှုန်းအားဖြင့် (၄၈.၀၄) ရာခိုင်နှုန်း မဲပေးခဲ့ကြောင်း သိရသည်။
