Home သတင်း မဲဆွယ်စည်းရုံရေးကာလ အနည်းဆုံး ၂ လ မရရှိပါက လွန်စွာခက်ခဲနိုင်ကြောင်း KNDP ထုတ်ပြန်

မဲဆွယ်စည်းရုံရေးကာလ အနည်းဆုံး ၂ လ မရရှိပါက လွန်စွာခက်ခဲနိုင်ကြောင်း KNDP ထုတ်ပြန်

914

စက်တင်ဘာ ၄ ရက်၊ ၂၀၂၀ ပြည့်နှစ်။ စောရှား

နိုင်ငံရေးပါတီများ မဲဆွယ်စည်းရုံရေးကာလ အနည်းဆုံး ၂ လတာ မရရှိပါက KNDP- ကရင်အမျိုးသား ဒီမို ကရက်တစ်ပါတီအနေဖြင့် လွန်စွာ အခက်အခဲ ပေါ်ပေါက်လာနိုင်ကြောင်း ယနေ့(စက်တင်ဘာ ၄ ရက်)တွင် သတင်းထုတ်ပြန် ကြေညာလိုက်သည်။

Covid-19 ကပ်ရောဂါကြောင့် ၂၀၂၀ ရွေးကောက်ပွဲ ရွှေ့ဆိုင်းရဖွယ် ရှိမရှိ အခြေအနေကို အောက်တိုဘာလမှ အသိပေးမည်ဟူသည့် ပြည်ထောင်စုရွေးကောက်ပွဲကော်မရှင် ပြောရေးဆိုခွင့်ရှိသူ၏ ပြောကြားချက်အရ ယခုလို ထုတ်ပြန်ရခြင်းဖြစ်ကြောင်း KNDP ဥက္ကဋ္ဌ မန်းအောင်ပြည်စိုးက ကေအိုင်စီသို့ ပြောသည်။

“စည်းရုံးရေးကာလက မထုတ်ပြန်သေးဘူး။ ရွေးကောက်ပွဲ လုပ်ဖို့ကြေညာထားတာက နိုဝင်ဘာ ၈ ရက်၊ ရွေး ကောက်ပွဲဖြစ် မဖြစ် ဟိုးအောက်တိုဘာလကုန်ခါ နီးမှ ကြေညာလိုက်မယ်ဆိုရင် တို့အတွက် နစ်နာပြီပေါ့။ ရွေး ကောက်ပွဲရွှေ့ရင် တစ်မျိုးတစ်မည်ပြောင်းသွားနိုင်တာပေါ့။ အကြီးအကျယ်ပြင်ဆင်ထားပြီးမှ ရွေးကောက်ပွဲ မဖြစ်တော့ဘူး ဆိုရင်လည်း အလဟဿဖြစ်ပြန်ရောပေါ့။ တို့ပါတီအနေနဲ့ ထိုင်ရထရမလား။ ကိုးလိုးကန့်လန့် ဖြစ်နေတယ်” ဟု ပြောသည်။

ယနေ့ KNDP ၏လစဉ်ပုံမှန်အစည်းအဝေးအပြီး ထုတ်ပြန်ချက်တွင် မည်သည့်အခြေအနေတွင်မဆို ရွေးကောက်ပွဲ မဲဆွယ်စည်းရုံးရေးကာလကို အနည်းဆုံး နှစ်လကြာ ခွင့်ပြုစီစဉ်ပေးသင့်ကြောင်း ပြည်ထောင်စုရွေးကောက်ပွဲ ကော်မရှင်အား တိုက်တွန်းတောင်းဆိုသည်ဟု ဖော်ပြထားသည်။

ထို့အပြင် ကိုဗစ်ရောဂါထိန်းချုပ်ရေးနှင့် ရွေးကောက်ပွဲကို အထောက်အကူပြုနိုင်ရန် ၂၀၂၀၊ စက်တင်ဘာ ၁ ရက်တွင် ထုတ်ပြန်ကြေညာသည့် ညီနောင်မဟာမိတ်သုံးဖွဲ့၏ ရက်ပေါင်း ၇၀ ကြာ တဖက်သတ် အပစ်ရပ်စဲရေး ကြေညာချက် အပြည့်အဝထောက်ခံကြောင်းနှင့် ငြိမ်းချမ်းရေးအတွက် သက်ဆိုင်သူအားလုံးက ဆက်လက်ဝိုင်း ဝန်းကြိုးပမ်းဆောင်ရွက်ကြရန် အလေးအနက်တိုက်တွန်းကြောင်းလည်း ထုတ်ပြန်ချက်ထဲ၌ ပါရှိသည်။

KNDP ၏ ယခုအကြိမ် လစဉ်အစည်းအဝေးတွင် ထုတ်ပြန်ထားသည့် အချက်များအပါအဝင် ရွေးကောက်ပွဲ အောင်နိုင်ရေးအတွက် လက်ရှိ လုပ်ဆောင်ထားသည့်အရာများ၊ ဆက်လက်လုပ်ဆောင်သွား မည့်အခြေအနေများ၊ အခက်အခဲ၊ ပြဿနာ၊ အောင်မြင်မှု အကြောင်းအရာများကိုပါ ဆွေးနွေးသုံး သပ်ကြကြောင်း ပါတီတာဝန်ရှိသူများက ပြောသည်။