မတ်လ ၂၅ ရက်၊ ၂၀၁၉ ခုနှစ်။ ကေအိုင်စီ
ကရင်ပြည်နယ်၏ အလှအပများကို ခရီးသွားဧည့်သည်များ မီးပုံးပျံစီးနင်းပြီး ကြည့်ရှုခံစားနိုင်သည့်အခွင့်အရေး တစ်ခုဖြစ်လာမည့် Oriental Ballooning Myanmar ခရီးစဉ်အတွက် အကောင်အထည်ဖော်လုပ်ဆောင်နေ သည့် Myanmar Ballooning Co-Ltd မှ အကြိုစမ်းသပ်ပျံသန်းမှုများကို ဖားအံမြို့တွင် စတင်လုပ်ဆောင် နေပြီဖြစ်သည်။
ပြည်နယ်ခရီးသွားလုပ်ငန်းကဏ္ဍ ဖွံ့ဖြိုးတိုးတက်စေရေးအတွက် အထောက်အကူတစ်ခုဖြစ်လာနိုင်မည့် အဆိုပါ ခရီးစဉ်အတွက် စမ်းသပ်ပျံသန်းမှုများကို Myanmar Ballooning Co-Ltdက မတ်လ ၂ဝ ရက်နေ့မှ စတင်ကာ ယနေ့ (မတ်လ ၂၅ ရက်)အထိ ဖားအံမြို့ သီရိကွင်းတွင် စမ်းသပ်လုပ်ဆောင်နေခြင်းလည်းဖြစ်သည်။
မီးပုံးပျံ ပျံသန်းရေးခရီးစဉ် ဦးဆောင်သူ Myanmar Ballooning Co-Ltd မှ မန်နေဂျာ ကိုဇာနည်က “ အဓိက ခရီးသွားလုပ်ငန်းဖွံ့ဖြိုးတိုးတက်ရေးအတွက် ခရီးသွားလုပ်ငန်းရဲ့ Activity တစ်ခုအဖြစ် ကျနော်တို့ပါဝင်တာပေါ့။ နိုင်ငံခြားသားတွေ ဖားအံကိုလာလည်ရင် လုပ်စရာတစ်ခုတိုးလာတာပေါ့။ အဲဒီအတွက် နိုင်ငံခြားဝင်ငွေလည်း ပိုရလာမှာဖြစ်တယ်။ အခုစမ်းသပ်ပျံသန်းမှုအတွက်လည်း ကရင်ပြည်နယ်အစိုးရက အများကြီးကူညီမှုတွေပေး ပါတယ် ” ဟုပြောသည်။
မီးပုံးပျံ ခရီးစဉ်စမ်းသပ်ပျံသန်းခြင်းကို လေကြောင်းဆိုင်ရာ အမှတ်အသားများ၊ ပျံသန်းရေး လမ်းကြောင်းများ၊ မြေပြင်ဆင်းသက်ကွင်းနေရာများ မှတ်သားခြင်း၊ ရာသီဥတုဆိုင်ရာ အချက်အလက်များတိုင်းတာ တွက်ချက် မှတ်တမ်းပြုစုခြင်းများဖြင့် မနက်ပိုင်းအချိန်များတွင် လေ့လာစမ်းသပ်မှုများပျံသန်း ပြုလုပ်နေခြင်း ဖြစ်သည်။
Myanmar Ballooning Co-Ltd အနေဖြင့် ပုဂံ၊ အင်းလေး၊ ငပလီနှင့် မန္တလေးစသည့် မြို့များတွင် မီးပုံးပျံခရီး စဉ်ပျံသန်းဝန်ဆောင်မှုများပေးနေသည့် ကုမ္ပဏီတစ်ခုဖြစ်ပြီး ယခု ကရင်ပြည်နယ်တွင် လုပ်ငန်းတိုးချဲ့နိုင်ရေး အတွက် ပဏာမအနေဖြင့် ကွင်းဆင်းကာအကြိုစမ်းသပ်ပျံသန်းမှုများပြုလုပ်ခြင်းဖြစ်သည်ဟုလည်း သိရသည်။
မီးပုံးပျံစီးနင်းပြီး သဘာဝအလှအပများကို ခံစားနိုင်သည့် ခရီးသွားဝန်ဆောင်မှုများမှာ ယခင်က ကရင်ပြည်နယ် တွင် မရှိခဲ့ဘူးသည့်ခရီးသွားလုပ်ငန်းအစီအစဉ်တစ်ခုဖြစ်သည်။