စက်တင်ဘာ ၁၁ ရက်၊ ၂၀၁၈ ခုနှစ်။ နန့်ဘွားခလိန်
ဧရာဝတီတိုင်းဒေသကြီး ပန်းတနော်မြို့နယ်အတွင်း ကျေးလက်နေ အမျိုးသမီးများအတွက် ဝင်ငွေတိုးစေရန် ရည်ရွယ်ပြီး တပိုင်တနိုင် သင်ဖြူးဖျာ ယက်လုပ်ခြင်းလုပ်ငန်းဖြင့် ဝင်ငွေရှာဖွေခြင်းကို INGO အဖွဲ့တစ်ခု၏ ပံ့ပိုးမှုနှင့် စီမံကိန်းတစ်ရပ်အနေဖြင့် လုပ်ဆောင်နေပြီးဖြစ်ကြောင်း သိရသည်။
အဆိုပါ တပိုင်တနိုင် သင်ဖြူးဖျာယက်လုပ်ခြင်းလုပ်ငန်း စီမံကိန်းကို LIFT (Livelihoods and Food Security Trust Fund) မှ ငွေကြေးထောက်ပံ့ပေးခြင်းနှင့် GRET MYANMAR (INGO) အဖွဲ့၏ စီမံကိန်း ပံ့ပိုးမှုဖြင့် ပန်းတနော် ကရင်လူငယ်များ ( PKY) အဖွဲ့မှ ဇူလိုင်လ ၁ ရက်နေ့မှ စတင်ကာ အကောင်အထည် ဖော်လုပ်ဆောင်ခြင်း ဖြစ်သည်။
(PKY)အဖွဲ့မှ စရဲသူရိန်ဟန်က “လက်ရှိ သင်ဖြူးဖျာလုပ်ငန်း လုပ်ဆောင်ရင်းနဲ့ သူတို့ရဲ့ စွမ်းဆောင်ရည် မြင့်တက်လာအောင် တခြားကဏ္ဍကနေ ကျနော်တို့က သင်တန်းတွေ ပေးတယ် ။ အစုအဖွဲ့ပုံစံနဲ့ လုပ် ဆောင်တတ်လာအောင် ၊ ကိုယ်ပိုင် ငွေစာရင်းလေးတွေ ရေးဆွဲတတ်လာအောင်၊ လုပ်ဆောင်နေတဲ့ စီမံ ကိန်းကနေ တစ်ဆင့် နောက်ပိုင်းဝင်ငွေ ပိုတိုးပွားလာပြီး အခြားအသက်မွေးဝမ်းကျောင်း လုပ်ငန်းတွေကို လည်း လုပ်ဆောင်တတ်လာစေဖို့ အတွက်ပေါ့နော်” ဟု ကေအိုင်စီသို့ ပြောသည်။
ဒီဇင်ဘာလ ၃၁ရက်နေ့ အထိ သတ်မှတ်ထားသည့် စီမံကိန်းကာလအတွင်း သင်ဖျာဘဏ်တစ်ခု တည်ထောင်ပေးထားကာ စီမံချက်ကျေးရွာအတွင်းရှိ စိတ်ပါဝင်စားသူ အမျိုးသမီး ၂ဝဦးကို သင်ဖြူး ဖျာများယက်လုပ်စေပြီး ၎င်းတို့မှ တစ်လလျှင် အနည်းဆုံး ၄၅,၀၀ဝကျပ် တန်ဖိုးရှိ သင်ဖြူးဖျာများကို ပေးသွင်းရမည်ဖြစ်သည်ဟု သိရသည်။
အဆိုပါ သင်ဖြူးဖျာများကို ပြန်လည်ရောင်းချခြင်းဖြင့် ဝင်ငွေရှာဖွေပေးသည့် နည်းလမ်းဖြစ်ပြီး ထိုသို့ လုပ်ဆောင်နိုင်ရန် အမျိုးသမီး ၂ဝ ဦးထဲမှ ၅ ဦးကို အဖွဲ့ခေါင်းဆောင်အဖြစ်ထားကာ ငွေထိန်း၊ ဈေးကွက်ရှာသူ၊ သင်မထုတ်ပေးသူ၊ ဖျာလက်ခံသူ စသည်ဖြင့် လုပ်ငန်းတာဝန်အသီးသီးခွဲဝေပြီး အစုအဖွဲ့ ပုံစံဖြင့် စုပေါင်းလုပ်ဆောင်သွားကြမည်ဖြစ်သည်ဟု စီမံကိန်းတာဝန်ရှိသူများက ပြောသည်။
သင်ဖြူးဖျာ ယက်လုပ်သူ နမ့်ကြည်ကြည်ဝင်းက “၂၈ရက်နေ့ဆိုရင် အနည်းဆုံး ၄၅,၀၀ဝ ကျပ်တန်ဖိုးရှိတဲ့ ဖျာကို သွင်းရတယ်။ အဲ့ဒါထက် များလည်းရတယ်။ အစပိုင်း ပထမလတုန်းက မိုးကရွာတော့ လုပ်ရတာ နည်းနည်းကြပ်တည်းတာပေါ့နော်။ အခုလကတော့ နေလည်းပူတော့ အဆင်ပြေတယ်။ အရင်ကလုပ်တာ ထက် စာရင် ပိုအဆင်ပြေလာတယ်။ ငွေတိုးလည်း သွားယူစရာ မလိုတော့ဘူး ” ဟု ပြောသည်။
ထိုသို့လုပ်ဆောင်ခြင်းဖြင့် ဒေသထွက်ကုန်များဖြင့် အသက်မွေး ဝမ်းကျောင်းများလုပ်ကိုင်ပြီး ပြင်ပတွင် အလုပ်ထွက်လုပ်ကိုင်ရသူ နည်းပါးလာစေရန်၊ ငွေတိုးကြေးတိုး ရယူခြင်းများ လျော့နည်းလာစေရန် ၊ မိသားစုများမှ ဝင်ငွေ တိုးလာခြင်းဖြင့် သားသမီးများ၏ ပညာရေးကဏ္ဍတွင် ပိုမိုအားပေး လာနိုင်စေရန် မျှော်မှန်းထားကြောင်း တာဝန်ရှိသူများက ပြောကြားသည်။
ယခုစီမံကိန်းကို ပန်းတနော် မြို့နယ်တွင် ပထမဆုံးစတင်အကောင်အထည်ဖော်ခြင်းဖြစ်ပြီး မြို့နယ်အတွင်း နေထိုင်သူ များအနေဖြင့် လယ်၊ ယာ၊ ကိုင်းသီးနှံ၊ ကွမ်း၊ ရေလုပ်ငန်းစသည်တို့အပြင် သင်ဖြူးဖျာယက်လုပ် ရောင်းချခြင်း လုပ်ငန်းကိုလည်း တပိုင်တနိုင် အသက်မွေးဝမ်းကျောင်းလုပ်ငန်း အဖြစ် လုပ်ကိုင်ကြသည်ဟု လည်းသိရသည်။