အကောင်းဆုံးကို မျှော်လင့်ကာ အရှိန်မြှင့်ရမည့် အမျိုးသားရေး
၁၉၉၉ခုနှစ်မှစ၍ နှစ်စဉ် ကျင်းပခဲ့သော ကရင်အမျိုးသားစည်းလုံးညီညွှတ်ရေး နှီးနှောဖလှယ်ပွဲ နောက်ထပ် ခြေလှမ်းတစ်ခုအ ဖြစ် ကရင်အမျိုးသားနှီးနှောဖလှယ်ပွဲကြီးတစ်ရပ်ကို ကရင်အမျိုးသားအစည်းအရုံး-ကေအဲန်ယူ၊ ဖားအံခရိုင်ဌာနချုပ် လေးဝါး စခန်း၌ ယခုနှစ် မေ ၆ရက်မှ ၈ရက်နေ့အထိ ကေအဲန်ယူက ဦးဆောင်ကာ ပြုလုပ်ကျင်းပတော့မည်ဖြစ်သည်။ ပြီးခဲ့သည့်နှစ်များ တွင် နယ်ပယ်အသီးသီးရှိ ကရင်လူမျိုးစု အသိုင်းအဝိုင်းများအတွင်းမှ ဘာသာရေးအဖွဲ့အစည်းများ၊ နိုင်ငံရေးပါတီများ၊ လက်နက် ကိုင်အဖွဲ့အစည်းများ၊ လူထုအခြေပြု လူမှုအဖွဲ့အစည်းများ၊ အမျိုးသမီး၊ လူငယ်နှင့် တတ်သိပညာရှင်များက အမျိုးသားစည်းလုံး ညီညွှတ်မှုအရေး တက်ရောက်ဆွေးနွေးခဲ့ကြသည်။ ယခုတစ်ကြိမ်တွင် အနာဂတ်အမျိုးသားစီမံကိန်းကို အကောင်အထည်ဖော် နိုင်စေရန် အလို့ငှာ အမျိုးသားစည်းလုံးညီညွှတ်ရေး၊ မျိုးနွယ်စုအရေး၊ ပညာရေး၊ ကျန်းမာရေး အစရှိသော ကဏ္ဍအသီးသီးကို မြှင့်တင်နိုင်ဖို့ရာ မဟာဗျူဟာများ ရေးဆွဲချမှတ်သွားမည်ဖြစ်ကြောင်း ကမကထပြု ဦးဆောင်သူများက ဆိုသည်။
၂၀၁၄ခုနှစ်၊ မေလ ၃ဝရက်နေ့က ထုတ်ပြန်ခဲ့သည့် ၁ဝကြိမ်မြောက် Karen Unity Seminar-KUS ၏ ကြေညာချက်ထဲတွင် စည်းလုံးညီညွတ်မှုကို အခြေခံသော အမျိုးသားရည်မှန်းချက် ပန်းတိုင်ရောက်ရှိရန် အလွှာစုံကရင်အမျိုးသားများ စုံညီစွာ လုပ် ကိုင်သွားမည်ဆိုသော်လည်း ကရင့်ရေးရာ အထွေထွေကိစ္စရပ်များတွင် စည်းလုံးညီညွတ်မှုနှင့် ပွင့်လင်းမြင်သာမှုမှာ အားနည်း နေသေးသည်။ လုပ်ငန်းစဉ်တိုင်းတွင် ဦးတည်ရည်မှန်းချက်၊ ကြိုတင်ပြင်ဆင်မှု၊ စုပေါင်းအကောင်အထည်ဖော်မှုနှင့် ပြန်လည်သုံး သပ်မှုများကို မဖြစ်မနေ ထည့်သွင်းလုပ်ဆောင်သင့်သည်။ ၎င်းအပြင် ဆုံးဖြတ်ချက်များကလည်း လက်တွေ့တွင် မည်မျှအကျိုး သက်ရောက်မှုရှိမရှိ၊ အခက်အခဲ/စိန်ခေါ်မှုများ မည်သို့ရှိသည်နှင့် အခွင့်အလမ်းများကို မည်သို့ရှာဖွေလုပ်ဆောင်သွားမည်ဆို သည်ကို ဆန်းစစ်သွားမှသာလျှင် လိုအပ်မှု၊ ထိရောက်မှုများကို တိုင်းတာနိုင်မည်ဖြစ်သည်။
ကုန်လွန်လာခဲ့သည့် ကာလကို ပြန်ပြောင်းကြည့်လျှင် ကရင်အမျိုးသား နိုင်ငံရေးဦးဆောင်အဖွဲ့ဖြစ်သည့် ကေအဲန်ယူပင် ညီညွတ်သောတိုင်းရင်းသားလူမျိုးများဖက်ဒရယ်ကောင်စီ(UNFC)၏ အဖွဲ့ဝင်အဖြစ်မှ ယာယီ ရပ်ဆိုင်းလိုက်ခြင်း၊ ကရင့်တော် လှန်ရေးလက်နက်ကိုင်အဖွဲ့ ၄ဖွဲ့ပါဝင်၍ ကော်သူးလေတပ်မတော်(KAF) ဖွဲ့စည်းခဲ့ပြီးနောက် အမျိုးသားနိုင်ငံရေး ဦးဆောင်မှုအ တွင်း သဘောထား မတိုက်ဆိုင်မှုများ ပိုမို ဖြစ်ပွားလာကာ လူထုတွေ့ဆုံပွဲများအထိ တစ်ဦးပေါ်တစ်ဦး ပြစ်တင်ပြောဆိုမှုအချို့ ရှိ လာသည်။ စင်စစ် အဖွဲ့အစည်းတိုင်းတွင် အမြင်သဘောထား မတူညီမှုများ ရှိတတ်စမြဲဖြစ်သော်လည်း အမျိုးသား ရည်မှန်းချက် ပန်းတိုင်အတွက် ချီတက်ရာတွင် မတူညီမှုများကို ပေါင်းစပ်ရင်း အလွှာစုံ ပါဝင်သော စုစည်းညီညွတ်မှု ပိုမိုအားကောင်းရေး ကရင်အမျိုးသားနှီးနှောဖလှယ်ပွဲကြီးက ဦးတည်ကြိုးပမ်းသွားရပေမည်။
ခေတ်အဆက်ဆက် အုပ်စိုးသူ မြန်မာအစိုးရအနေဖြင့် ၎င်းတို့ တစ်ပါတီစနစ်၊ စစ်အာဏာရှင်စနစ် ကျင့်သုံးခဲ့သည့် ကာလများ တွင် ခွဲခြားအုပ်ချုပ်မှုစနစ် (Divide and Rule)ဖြင့် “အိမ်ကြက်ချင်း အိုးမဲသုတ်”သည့် သပ်လျှိုသွေးခွဲနည်းသုံးကာ တိုင်းရင်းသား တော်လှန်ရေးအဖွဲ့များ၊ ဒီမိုကရေစီအင်အားစုများနှင့်အပြင် လူထုအတွင်း၌လည်း အချင်းချင်း ယုံကြည်မှုကင်းမဲ့အောင် ပြုမူလုပ် ဆောင်ခဲ့မှု များစွာရှိခဲ့သည်။ စစ်မှန်သည့် ငြိမ်းချမ်းရေးကို အခြေခံသော အမျိုးသားစီမံကိန်းတစ်ရပ်ကို ရေးဆွဲဆောင်ရွက်မှုသည် လူမျိုးတစ်မျိုးအတွက် စည်းစနစ်ကျသော အနာဂတ်ကို ပုံဖော်နေသော်ငြား မလိုလားသူများအတွက် ပျက်စီးရာပျက်စီးကြောင်း တိုက်ဖျက်စရာ လုပ်ရပ်တစ်ခု ဖြစ်လာနိုင်သည်ကိုလည်း မမေ့သင့်ပေ။
“ညောင်သီးလည်းစား လေးသံလည်းစွင့်” ဆိုသကဲ့သို့ လုပ်သင့်လုပ်ထိုက်သည်ကို အချိန်အခါနှင့်အညီ ဆောင်ရွက်သွားရင်း စည်းလုံးမှုကို ပျက်ပြားစေသည့် အရိပ်လက္ခဏာများနှင့် စနစ်တကျ လုပ်ဆောင်လာခဲ့သည့် သမိုင်းဖြစ်ရပ်များကို ဘက်စုံထောင့် စုံ သင်ခန်းစာယူကာ သတိရှိမှသာ အမျိုးသားစီမံကိန်းပန်းတိုင်သို့ တက်လှမ်းနိုင်မည် ဖြစ်သည်။ အချုပ်အားဖြင့်ဆိုရသော် မျိုး နွယ်စု၊ နေရာဒေသ၊ ယုံကြည်ကိုးကွယ်မှုနှင့် စာပေ၊ စကားတို့ ကွဲပြားသော်ငြား ကရင်လူမျိုးများသည် နှစ်ပေါင်း ၇ဝနီးပါး ခုခံ တော်လှန်စစ်ကာလမှ လွတ်လပ်ပွင့်လင်းသော အနာဂတ်ဆီသို့ မဟာဗျူဟာကျစွာ ဦးတည်လှမ်းချီရေး “ထိုးခွဲသူအခက် မိမိအ ချက်”ဖြစ်အောင် စုစည်းမှုအားဖြင့် အရှိန်အဟုန်များကို မြှင့်တင်သွားသင့်ပါကြောင်း တိုက်တွန်းလိုက်ရပေသည်။
