ကိုယ့်ရပ်ရွာ ကိုယ့်ဒေသ
မတမ်းတတဲ့သူတွေ ဘယ်သူများရှိပါလဲ
ကိုယ့်မွေးဋ္ဌာနေ
မဝေးချင်ပေမဲ့
အခြေအနေမပေး
တပြည်တရွာက လွမ်းဆွေးနေရတယ်လေ
ကြည့်လှည့်ပါအဆွေ
ဇွဲကပင်မြေတဲ့
ဖားစည်သံဝေတဲ့ နေရာလေးပေါ့
စိမ်းလန်းစိုပြေ
ဝါရွှေရောင်စပါးခင်း
ပျံ့သင်းတဲ့ လယ်ယာတွေ မြင်ယောင်မိပါရဲ့
တောသူဆိုပေမဲ့
တကယ့်စိတ်ရင်းဖြူ
မငြူစူတတ်တဲ့ ကရင်မလေးတွေ
ပျော်တဲ့ဋ္ဌာနေပေါ့
ဒါပေမဲ့
အေးချမ်းတဲ့ ဒီနယ်မြေ
ခုတော့
န.အ.ဖ ဒီကေဘီအေ
သူတို့တတွေ စိတ်တိုင်းကြ
အစိုးရ နေကြတယ်လေ
ဘာကြေး ညာကြေး … တဲ့
လုပ်အားပေးကလည်းတမှောင့်
ရှင်သန်မှုရဲ့ အနှောက်အယှက်တွေပေါ့
ရိုးစင်းစွာ ဘဝကို ထုဆစ်
အငတ်နွံထဲ မနစ်ရုံတမယ်
လှုပ်ရှားရုန်းကန်ကြရတယ်
အော် … ကိုယ့်ရပ်ရွာ ကိုယ့်ဒေသ
ရိုးမြေကြနေချင်ပေမဲ့
အုပ်ချုပ်သူမကောင်းတဲ့ စနစ်တွေကြောင့်
ဋ္ဌာနေမျှော်တိုင်းဝေးတော့သည်
စောဒါးဒါး (ဒုံရင်းမြေ)